Tangkhang hmuah dan tur sawiho

Zanin zanlai leh naktuk zingah Bai­rabi rél chawlhhmunah Madhya Pradesh leh Gujarat-a Mizo tangkhangte an rawn thleng leh dawn a, tangkhangte felfai zawka an inkhung hranna tur hmuna hruai a nih theih nan nimin khan Kolasib DC Dr H Lalthlangliana hoin Kolasib district-a official leh task force-te DC conference hall-ah an ṭhukhawm. Zanin leh naktuka lo haw tura inhriattir zat chu mi 1,975 an ni.

Dr H Lalthlangliana chuan, Bairabi rél chawlhhmuna rawn thlengte phurtu tur bus-te chu mi tam zawkin an veng (escort) tawh dawn thu sawiin, "Tangkhang phur bus kawng lakah ding an awm chuan blacklist zel an ni ang," a ti a; tangkhang phur tur zinga zu rûi pahnih chu hrèn an nih tawh thu a sawi.

Kolasib DC chuan, tangkhang rawn haw, Vairengte checkgate paltlang turte tan screening paltlang ngei a ngaih thu sawiin, "Passenger phur motor zawng zawngte chuan an motor-ah C-19 tih leh an kalna tur district hming motor windshield-an an tár ngei ngei a ngai," a ti.

Tangkhangte chuanna motor reng reng chu convoy-a kaltir vek tawh tur a nih thu sawiin Bawrhsap chuan, "Tangkhang rawn hawte hi private motor pawh ni se, anmahni remchan hun huna an kal a rem tawh dawn lo," a ti a; Vairengte leh North Chhimluang inkar­ah lirthei dan khawmna siamin, motor panga aia tlem loin an kaltir zel tawh dawn thu a sawi a ni.