CQC chungchanga pawimawh inzirtir

Nimin khan BCM Lunglei Lunglawn East Kohhran Hall-ah Lunglei district-a kohhran hall hrang hrang community quarantine centre (CQC) atana hmante kaihhruaina leh hriat tur pawimawhte zirhona hun buatsaih a ni a; sorkar official, doctor, task force leh kohhran hruaitute an tel.

Awareness campaign hi Lunglei DAO Tlangtinmawia Zote-in a kaihruai a; magistrate C Laltleipuii chuan, state danga tangkhang Mizo hruai haw mekte awmna tura kohhrante'n an hall-te hman an remti chu lawmawm a tih thu a sawi.

Lungleia TB officer Dr LC Liana chuan, Co­vid-19 hri chungchang leh inkaihhruainate sawiin, páwng hlauh chiamin awm­zia a nei lo tih a sawi a, "Sorkarin inkaihhruaina a siamte fimkhur taka kan zawm chuan kan him tlang thei a ni," a ti. Covid-19 darh lohna tura sorkarin kaihhruaina a siamte zâwm ṭheuh turin CQC-a mawhphurtute a chah.

He hunah hian CQC chu rapid antibody test (RAT) paltlangte chauh dahna tur a nih thu leh an awm chhunga an bawlhhlawh tling khawmte chu tihthianghlima paih a nih tur thu tarlan a ni.

Tun dinhmunah Lung­lei district-a kohhran 20-te'n CQC atan an hall hman an remti a; BCM Rahsi Veng, Chanmari Presbyterian Kohhran, BCM Zobawk Bazar N leh Synod Mission Centre, Salem Vengte CQC atan hman ṭan tawh niin, centre-ahte hian mi pariat an awm mek.

Lunglei district-ah hian khung hran (quarantine) mek mi 190 an awm a, chu'ngte chu sorkar quarantine facility-ah mi 139, mahni inah mi 43 leh kohhran hall-ah mi pariatte an awm a ni.