Assembly budget session tan a ni Sorkar sum hmuh a pung: Governor

Mizoram Legislative Assembly pasarihna session vawi riatna chu nimin khan ṭan a ni a; a ṭannaah Governor Lt.Gen. Nirbhay Sharma chuan darkar khat leh minute 26 chhung thu a sawi a, "Ka sorkarah chhiah leh chhiah ni lo aṭanga sum hmuh a pung," a ti.

Larsap chuan, Mizoram sorkarah chhiah (tax) leh chhiah ni si lo aṭanga sum lak luh (non tax revenue) a pun thu sawiin, "Taxation department chuan sorkar kum kal mekah January 2016 thleng khan revenue cheng vbc. 218.73 an hmu," a ti a; MLPC Act hman a nih hnuah Excise duty aṭangin January thleng khan cheng vbc. 47.75 hmuh a ni tawh tih a sawi.

Governor-in Mizoram sorkarin kum kal meka sum a hmuhna dang a sawite chu - Transport department aṭangin December 2015 thleng cheng vbc. 16.88, state lottery aṭangin January 2016 thleng cheng vbc. 9.12, Small Saving Schemes hnuaia net collection aṭangin January 2016 thleng vbc. 4.89, Revenue department aṭangin December 2015 thleng Tax Revenue aṭangin vbc. 4.02 leh, registration fee/stamp duty aṭangin vbc. 2.31 leh Geology & Mineral Resources aṭangin December 2015 thleng vbc. 3.95 te a ni.

Mizoram sorkarin village council/local council-te hnenah chhiah khawn hna pek a tum tih sawiin Governor chuan, "VC leh LC-te hi commission atan 5% pek an ni ang. A enchhinna atan Aibawk RD Block thlan a ni a, January 15, 2016 khan hawn a ni," a ti.

Larsap chuan, Mizorama autonomous district council (ADC) pathumte tihhma-sawnna atan mawhphurhna pawimawh tak an nei tih sawiin, "ADC pathumte tan hian plan leh non-plan aṭangin cheng vbc. 148.18 leh vbc. 159.92 pek chhuah a ni tawh," a ti a; heng bakah hian NLCPR, 13th Finance Commission leh thil dang aṭangin ADC-te chu sum pek an nih thu a sawi.

Mizoram sorkarin kawng ṭha a ngai pawimawh tih sawiin Larsap chuan, "PWD-in kawng atan formation cutting km. 62.44-a thui, blacktoping km. 109.94-a thui, culvert 152 leh retaining wall cheng vbc. 129.53-in an siam tawh. Cheng vbc. 43.64-in lei pali leh hmun 78-ah cheng vbc. 3633.32 sengin kawng siam mek a ni," a ti.

Governor chuan NLUP chungchang sawiin, "Kum 2010-a NLUP ṭan a nih aṭangin trade hrang hrangahte hlawhtlinna duhawm tak tak a awm. NLUP kalpui hma aiin kalpui a nih hnuah buh hmun 39.04%-in a zau zawk a, buh thar chhuah pawh 22.21%-in a pung a ni," a ti a, kum 2010-a tlang ram buh chìnna atana ram mamawh hectare 28,562 ni ṭhin chu nikumah chuan hectare-ah 8497.195-ah a tlakhniam tawh thu a sawi.