Consumer Rights Day hmang

Nimin, March 15 kha World Consumer Rights Day a ni a, Mamit leh Serchhipah hman a ni.

World Consumer Rights Day hi Mamitah chuan Chhimveng YMA Hall-ah hman a ni a, Mamit DC leh Mamit District Consumer Organisation (MDCO) chairman Lalbiaksangi khuallian a ni. DC kaihruaiin mipuite'n an thil lei leh hralha harsatna an tawhte aṭangin zawhna hun hawn a ni a; Mamit District Forum member Lalramthangi'n consumer-te dikna leh chanvo hrang hrangte a sawifiah.

Serchhipah chuan District Consumers Association hmalaknain DC conference hall-ah hman niin, thupui chu 'Antibiotic resistance' tih a ni a, Serchhip DC Dr Lalrozama'n a hmanpui.

Dr Lalrozama chuan, khawvelin antibiotic an neih mekte chu mipuiin an hmang nasa tih sawiin, "Hmang dik lo hi 50% chuang an ni tih mithiamte'n an zirchiannaah an hmu chhuak a, kan damna tura kan ngaih antibiotic hi kan natna, min tichhetu a nih cháng a tam ta a ni," a ti a; fimkhur a ṭul thu a sawi.

Inkhawmah hian Serchhip district-a consumer association branch hrang hrang aiawh te, khawtual mite leh sorkar hnathawk te, bank, petrol pump leh MIZOFED aiawhte an tel a ni.