FSA ration card khulna tihsan dil Ration card dik lo tihdik mek a ni

Aizawl City Local Council Association (ACLCA) chuan, National Food Security Act (NFSA) hnuaia a man tláwma buhfai la thei turte ration card khul chhuahna man chu pakhat Rs. 20-a ti turin Supply department an ngen. Hetih lai hian, NFSA ration card-a dik lote siam ṭha turin department-in a buaipui mek.

ACLCA hian nimin khan Food, Civil Supplies & Consumer Affairs department director hnenah lehkha an thehlut a; NFSA hnuaia ration card khul chhuahna man Rs. 10 chu Rs. 20-ah tisang turin an ngen.

ACLCA hruaitute chuan, Food Security hnuaia ration card siamna turah FCSCA ngenna angin local council-te'n an huam chhung
ṭheuhah nasa takin hna an thawk a, mahse, hna an thawhnaa sum sensote FCSCA lamin a tumsak si lo tih an sawi a; veng tam takah chuan hming chhut luh hna thawk tur an ruai a, chu'ng an rawih mante pawh chu FCSCA-in tumsak loin, anmahni V/C-te'n an pe zel mai a, sum an sên belh char char niin an sawi bawk.

Ration card-a dik lo nasa tak awm chungchangah ACLCA hruaitute chuan, local council tinte chuan an veng chhung ṭheuha chhungkua leh chhungkaw member tinte hming, pian ni, thla leh kumte chiang taka an ziah lan vek thu sawiin, "Keini lam chuan dik takin kan ti a, FCSCA department lam hian an rawn ti dik lo a ni," an ti.

NFSA ration card-a dik lo tam tak awm chungchanga zawhna chhangin, FCSCA director R Lalramnghaka chuan, ration card dik lo tidik turin hna an thawh ṭan tawh thu Vanglaini a hrilh.

FCSCA Director chuan, "Theihtawp kan chhuah mek.. A dik loh ṭanna kan chhui a, kan inenfiah zel ang chu," a ti a; NIC-te nen pawh nimin khan an sawiho thu a sawi.