Mizoramah hel an ngampa ṭhin: HM Hel rálṭitnaah kan siam tawh: CM

Home minister R Lalzirliana chuan, MNF sorkar laiin Mizoramah hel an ngampa ṭhin niin a sawi a; chief minister Lal Thanhawla chuan, "Mizoram hi helte rálṭitna ramah kan siam tawh," a ti.

Nimina Police headquarters, Khatlaa building thar sak tur lungphùm a phùm hnua inkhawm buatsaihah thu sawiin Chief Mi-nister chuan, tun hmain Mizoramah hel an tlangnêl a, au chhuahpui a nih pawhin police-te'n thubuai an siamsak an hriat ngai loh thu police officer kalkhawmte chu a hrilh.

Chief Minister chuan, helte thubuai siamsak an nih loh avangin police-te a dem loh thu sawiin, "Nangmahni kaihruaitute kan dem. Home Minister hoin theihtawp chhuah a ni a, tunah chuan mi ṭha lote leh helte rálṭitna ramah kan siam tawh. Hei hi kan chhunzawm zel pawh ka beisei," a ti.

Police-te chu mipuite ṭhian an ni tur a ni tih sawiin Lal Thanhawla chuan, "Police-te chu misualte ṭih em em, mi felte nêl tak an ni tur a ni. Ramin a thlamuanpui tur che u a ni," a ti a; police-te chu mipuiin an thlamuanpui theihna atan an inthununna uluk turin a chah.

CM Hawla chuan, Mizoram chu India rama police housing nei chhe ber a ni mai thei tih sawiin, "Tun hma lama police modernisation scheme a nih tur ang hman a ni lo kha kan tuar hle. Chenna hmun leh hnathawhna hmun a ṭhat loh chuan rilruah a nghawng thei. Chuvangin, theihtawp kan chhuah zel a ni," a ti.

Inkhawmah hian Home Minister pawhin thu sawiin, "Congress sorkar loh zawk chhungin Mizoram hi helte chêttlatna hmun a ni ṭhin a, Aizawl khawpui ngeiah pawh hel an awm ṭhin a, man an ni ngai lo," a ti a; sorkarna an chan hnuah police-te'n an tih tur dik tak tiin, silai pawh eng emaw zat man nghal a nih thu a sawi.

R Lalzirliana chuan, sum leh pai harsatna karah police-te tan theihtawp an chhuah zel tih sawiin, remna leh muanna rama awm an nih avanga inthlahdah lo turin police-te chu a chah.

Police headquarters building hi cheng nuai 1,555.79 senga sak tur a ni a, a sak hna hi Northeast Consultancy Services (NECS)-in an thawk ang. October 1, 2015 aṭangin hna thawh ṭan a ni a, thla 30 chhunga zawh tur a ni.