KHAWTHLIR

Chanchin Tha Thlen Ni hmang

Nimin khan Mizorama Chanchin Ṭha Thlen Ni a ni a, he ni pual hian zan lamah Presbyterian Kohhrante'n hun an hmang. March 15, 1891-a Rev. William Williams-a'n Kawnpui rama Tlawng lui kam, Kutbul lui chhuaha Mizote hnena Pathian thu a hrilna hmasa ber champhaah Chanchin Ṭha Thlen Ni hi hman a ni a, kum 2014 aṭangin hman ṭan a ni.

Thisen pe

Lunglei Electric Veng pastor bial ṬKP-te chuan, nimin khan blood donation camp an huaihawt a, Lunglei Civil Hospital tan mipa 53 leh hmeichhia pakuate'n thisen unit 62 an pe.

Tui zirho

PHE department hnuaia Comunication and Capacity Development Unit (CCDU) chuan, nimin khan an conference hall-ah 'Water quality for private water sellers for Lunglei town' tih thupui hmangin Lungleia tui hralh ṭhinte pualin zirhona an buatsaih.

Tuipui humhalh

Tuipui lui dung nungcha humhalhtu tura, tun hnaia Kelkang branch YMA Hall-a inhmukhawm YMA branch pakuate chuan, "Tuipui lui dungah chinai leh túr lam chi te, kawlphetha hmang te, rû reng reng hmanga sangha man phal loh ni se," an ti.

FMGE&W

Kum 20162018 atana Federation of Mizoram Government Employess & Workers (FMGE&W) hruaitu tura thlan chhuahte chuan nihna an insiam rem a, president-ah Ramhmangaiha Ralte (Govt. J Thankima College) leh secretary general-ah R Lalrammawia (Transport dept)-te ruat an ni.

Lei siam dawn

PWD SDO, Bilkhawthlir chuan thuchhuah siamin, N. Chawnpui leh Saiphai inkar kawngpuia lei (bridge) chu a chak tawk tawh lo tih a tarlang a; lei hi kumin March 18 leh April 11 inkarah siamṭhat a ni dawn a, siam ṭhat chhungin lirthei kaltlang a theih a ni dawn lo tih a puang.