High Court Chief Justice leh CM inkâwm

Mizoram rawn tlawha zin, Gauhati High Court chief justice Ajit Singh chuan, Thawhṭanni tlai khan chief minister Lal Thanhawla chu a banglaah a kâwm a; Gauhati High Court, Aizawl Bench tihchangtlun nana mamawh te, harsatna an neihte leh rawtna chi hrang hrang a thlen.

CM Lal Thanhawla chuan, Mizoram sorkarin High Court thuam ṭhat a ngaih pawimawh thu sawiin, judge atana Mizoram quota chu Mizote ngeiin luah khat thei se a duh thu a sawi a, Chief Justice chu hma-lak-puiah a sáwm.

Chief Justice pawhin Chief Minister sawmna angin, a theih anga hmalak a tum thu leh Mizote zingah judge tura tling an pun theih nan Mizoramah Bar tih changtlun a pawimawha a hriat thu a sawi.

Inkawmnaah hian Mizoram Judicial Service Rules, 2006 chu tihchhuah mai tura peih a nih tawh thu te, Mizoram District Courts' Employees' Service Rules, 2015 pawh DPAR leh Finance department zir chian tura thawn a nih tawh thu an sawi lang.

Guwahati High Court sum hman ralna, utilization certificates pawh Law & Judicial department-in sorkar laipuia Ministry of Law and Justice-a a thehluh tawh thu leh 14th. Finance Commission rawtna anga hmalakna tur hrang hrang pawh Finance department ngaihtuah tura thehluh a nih tawh thu sawi lan a ni bawk.

Chief Justice hian CM Lal Thanhawla chu Gauhati High Court, Aizawl Bench enkawlna tihchak a nih theih nan Joint Registrar leh Deputy Registrar post siam belh turin a ngen a; Court leh thawktute tan district hrang hrangah ram ruahmansak tur leh, a ṭul anga in sak kawnga hmalakpui turin a ngen.

Inkawmnaah hian Law & Judicial minister Lalsawta leh secretary R Thanga an tel a; Chief Justice hi Gauhati High Court judge Michael Zothankhuma, registrar general Hitesh Kumar Sarma leh registrar Thang Lianmang Guite ten an ṭawiawm a ni.