Ration card dik loa mawhphurtute Lakah dan lekkawh a ṭul: CM

Chief minister Lal Thanhawla chuan, National Food Security Act (FSA) hman a nih avanga ration card thar dik loh chhana mawhphurhtute lakah dan lekkawh tur nia a hriat thu nimina Assembly session-ah a sawi.

Lal Thanhawla chuan, ration card dik lo a tam lutuk chu a pawi titu ber chu sorkarna changtute an ni tih sawiin, "Ration card dik lote hi siamṭhat mai ni loin, a mawhphurhtute lakah dan lekkawh tur niin ka hria. Engah nge kan hrem loh ang, tih ka rilruah a awm," a ti.

Mahni eizawnna chu ṭha tak thawh tur a ni tih sawiin Chief Minister chuan, "Hetiang mai maia mahni eizawnna hna thawh tur a ni lo," a ti a; Pathian ringtute phei chuan mahni hna ṭha tak thawh chu kan mawhphurhna a nih thu a sawi.

CM Hawla chuan, ration card siam thar chu an dawng ve tawh tih sawiin, "Ka nu leh pa la dam anga tarlan a nih bakah, sorkar hnathawk anga tarlan ka ni," a ti.

NFSA hman a nih avanga ration card siam tharah hian dik lo eng emaw zat a awm a, chhungkaw pakhata member-te pian kum inang vek te, chhungkaw member thun luh kim loh te, mitthi tawh ration card-a tarlante a awm a; chhungkaw ṭhenkhat chuan tun thlengin ration card an la dawng lo.

Vanglaini palai zawhna chhangin Supply department hotute chuan, ration card dik lo leh dawng lote chinfel hna chu an ruahmanna hmasaah chuan March 20, 2016-ah zawhfel an inbeisei tih an sawi a, "Mahse, dik lo a tam tak em avangin kan ruahman ang chuan kan zo hman lo," an ti a; an tum dana hna an thawh theih chuan April-ah zawh hman an inbeisei thu an sawi.

Ration card la dawng ve lote chungchangah Supply department hotute chuan, "An quota tur an dawn ve ngei theihna turin ruahmanna kan siam ang," an ti.