2018-ah kan mal din dawn: Zoramthanga

MNF president Zoramthanga chuan, kum 2018-a Assembly inthlan-pui lo awm leh turah MNF party chu party dang thawhpui loin an mal din dawn tih a sawi.

Zoramthanga hian March 14-15, 2016 chhung khan Mizo-ram hmarthlang lama khaw ṭhenkhat - Lung-dai, Serkhan, Nisapui, Lungmuat, North Chal-tlang, Bukpui, Thingthelh, North Hlimen, Saipum leh Saiphai khuate a tlawhnaah thu sawiin, “Kum 2018 hian MNF chuan MLA inthlanpui chuh turin Pathian leh mipui zarah a mala tling turin theihna a nei tha tâwk a, Aizawl khawpui rorelna AMC inthlanah MNF chuan sorkarna lain, a mala din a ṭhatna leh a thlumzia kan tem a ni," a ti.

Zoramthanga chuan, "Kum hnih chung tal bial mipuite leh candidate inkarah inhmelhriat ṭhat-na leh bial chhung zir chianna hun a awm theih nan, kan candidate tur 70% vel hnenah hma la tura inhrilhhriat rûkna neih hi kan hotute rilruah a awm,” a ti a; mi dang mitmei vên tur awm loa an kal dawn thu a sawi.

Congress sorkar chu sorkar hnathawkte'n an ning hle nia a puh bakah, Sorkarin hmasawnna hna thawhna tur sum an páwng sem ral nia sawiin, "Sámdâla chêngkek lawh policy-in zangthal chungin development an thlir a, engmah hmuh tur a awm lo. PWD Chief Engineer leh peon thawh tur chin pawh a danglam meuh lo, 'Sum a awm lo’ tia lo chhàn zawng kha an hna a ni mai,” a ti.

MNF President chuan, "Congress party chu a rah lawh tur awm lo thingkung ding ro mek a ni," tiin, Congress thing-kûng aṭangin mi nâwlpui an chhuk mek niin a sawi a, chutih laiin MNF chuan lawmluh rûnpui an nei mek zel niin a sawi.

MNF President chuan,Aizawl leh Kola-sib district khaw 31-a V/C inthlan lohnaah HPC(D)-te'n tihbuai an tum loh thu an sawi hnu pawha, Congress party kaihhruainaa Advisory Board an dinte’n khawtlang rorelna an keng reng chu democracy palzûtna a nih thu a sawi bawk.