PWD-in Tlawng lei dawh ṭhat thuai an tum

PWD changtu, chief minister Lal Thanhawla chuan, Tlawng lei, Sihhmui - Lengpui Airport kawnga bailey bridge dawh ṭhatna atan a hmanrua chah mek a nih thu House a hrilh a, lei vengtu tur dah a nih tawh tur thu a sawi.

MNF member Dr K Beichhua zawhna chhangin, Lal Thanhawla chuan, Tlawng lei chim chu sorkarin pawi a ti tak zet tih a sawi a, "Sorkarin pawi a ti lo anga sawite an awm ṭhin. A pawi ti ber chu sorkarna chelhtute hi an ni ang. Lei dawh tur hian a part order a ni a, hmuh kim a nih veleh dawh turin kan inpeih reng," a ti.

Chief Minister sawi danin, lei dawhna atan hian Shiba Industries, Kolkata aṭangin hmanrua chah a ni a, advance bill pek theih a nih chuan hmanruate chu February 20, 2016 khan an rawn thawn theih thu an sawi. Mahse, Ministry of Road Transport & Highways (MoRTH)-in phalna a pe thei lo.

MoRTH engineer-te chuan lei chim chu a hmunah an rawn en a, dawh vat vat hmanhmawhthlak an tih avangin advance pe turin thuneitute an nawr a ni. Advance pek a ni a, hmanrua a thlen veleh lei dawh a ni ang. Lei dawh chu thiam bik thil ngai a nih avangin, tender chhuah loin, department work-a kalpui ṭha tih a ni.

Zawh belhna chhangin Chief Minister chuan, "Phal chin bâk phurin an zawh lohna atan chiang takin zawh phal chin târ a ni ang. A chim tawh lohna atan leh phal chin aia tam phurin an zawh tawh lohna atan vengtu pawh dah tum a ni. He lei kher loah pawh hian vengtu hi dah a ni ang," a ti.

Lal Thanhawla chuan, lei vengtu dah tum ni mah se, sorkarah chuan thil tih zung zung theih a nih loh thu sawiin, mi thar lak a, an hlawh turte ngaihtuah fel a ngaih dawn thu House a hrilh.