Property tax aṭangin nuai 111 hmu tawh

Aizawl Municipal Corporation (AMC) mayor PC Lalhmingthanga chuan, property tax aṭangin AMC-in cheng nuai 111 chuang a hmuh tawh thu a sawi a, "Property tax aṭanga sum hmuh zinga 80% chu mipui vantlang mamawh hna thawh nan hman tur a ni," a ti.

AMC Mayor leh a thawhpuite chuan nimin khan AMC Audito-rium-ah press mite thingpui an inpui a; PC Lalhmingthanga chuan, property tax an khawn kal zelah chhiah la pe lo eng emaw zat an awm chungin cheng nuai 111 chuang an hmuh tawh thu leh, property tax-a sum hmuh zinga 80% chu vantlang mamawh thawh nan hman a ni dawn a, 20% chu chhiah khawn zelnaa hna pawimawh thawh nan hman a nih tur thu a sawi a ni.

PC Lalhmingthanga hian AMC hna thawh mekte sawi langin, pedestrian flyover bridge pathum siam turah pahnih siam mek a nih thu leh Chanmari YMA Hall hnuaia kawng hnuaiah cavern parking (lirthei hûnna) siam tum a nih thu a sawi a, "Cavern parking atan PWD aṭangin contractor NECS-in road cutting permission an la hmu thei lo a, estimate amount hi Rs. 66,87,000 a ni a, January 8, 2016 aṭanga chhiara thla kaw chhunga zawh tur a ni," a ti.

An election manifesto, Aizawla free wi-fi dah chungchangah AMC Mayor chuan, "Kum khat chhunga zawh hman tum a ni," a ti.

Zawhna chhangin, Licensing Regulation hnuaia licence/permit la turin mi an la nawr luih loh thu a sawi a, "Miin an mamawh avangin an rawn dil zawkn ṭhin," a ti a; loan lâk dawn leh thil dang ṭhenkhatah Licensing Regulation hnuaiah permit lak a ngaih thu a sawi.

Aizawl Mayor chuan, AMC huam chhunga veng tinah solar street light dah thuai tum a nih thu sawiin, "Street light 1,000 chuang vuah tum a ni a, veng tinah 10
ṭheuh vuah phawt tum a ni. Street light set khat hi Rs. 7,522 man a ni a, a chhawrtu mipuite'n an ta a ni tih an hriat theih nan Rs. 200 chu veng mipuite tum tur a ni," a ti.

PC Lalhmingthanga chuan, AMC huam chin lanna map ṭha tak siam tum mek a nih thu sawiin, "Map hi rintlak taka siam tur a ni a, leimin duhna lai hmunte chiang takin satellite thlalak hmanga tarlan a ni dawn," a ti a; map chu Geo Hazard International, Delhi-in anmahni sensoin an siam dawn tih a sawi.

AMC Mayor chuan, dik takin hna thawh an tum tih sawiin, "Mipui tana chhenfakawm, nun tinuamtu, ram leh hnam tahna ro siam tumin hma kan la mek a ni," a ti a; mipuite chu AMC hnathawhte ṭawiawm tur leh thuràwnte pe ṭhin turin a sáwm a ni.