KHAWTHLIR

Rangva lei zat

Disaster Management & Rehabilitation (DMR) minister C Ngunlianchunga chuan, MNF member Lalrinawma zawhna chhangin, kum 2015-16 chhungin Rs. 36,98,000-in rangva bundle 860 lei a nih thu leh, rangva chu chhungkaw 16 hnenah bundle li zela pek a nih thu a sawi.

Lei dawh tum

MNF member K Sangṭhuama zawhna chhang-in, PWD changtu chief minister Lal Thanhawla chuan, Ramthar Veng, Sihpui aṭanga Ṭhuampui kawnga Chite luiah lei dawn tum a nih thu House a hrilh.

Jubilee lawm

Champhai Electric Veng branch YMA chuan, Thawhlehni khan an kum 25 (Silver jubilee) tlin an lawm hawnna inkhawm an buatsaih a; kum tluan-in lawm an tum a ni.

Thisen pe

Khawngaihna Thutak group-te chuan nimin khan Aizawl Civil Hospital-ah thisen unit 6 an pe a, a petute mipa panga leh hmeichhia pakhat an ni.

Zu in mi duh lo

Awithangpa Group YMA Conference rorel inkhawm nimina Hortoki khuaa neih chuan, zu lei phalna (liquor card) neite chu YMA hruaitu atan hman loh ni se, an ti.

Unau thiin chhar

Lalramnghaka (20) leh a farnu Lalneihkimi (22), Laldawngliana, Serkhan fate chu nimin chawhma dar 10 pelh hret khan Tui-lut luiah an ruang hmuh a ni. Thu dawn danin, Lalneihkimi leh Lalram-nghakate hi Thawhlehni khan aidu khawrh turin ramah an kal a, an haw loh avangin an chhungte'n an zawng a, zanah khaw-tlangin an zawng nghal bawk a; nimin khan Tuilut luiah thiin an chhar a ni.

Lusûn khawhar

LPS Vision neitu, Laldail-ova Pachuau (83) chu nimin zing dar 6 khan chuap cancer vangin New Life Hos-pital-ah a thi a, nimin vek khan vûi a ni. Laldailova Pachuau hi kum 1957-ah Biakveli nen inneiin fa pa-sarih an nei a, sumdawnna lama mi hlawhtling tak niin, kum 1991 khan Mizo TV local channel LPS Vision a din a ni.