PA Sangma leh Mufti Mohammed Sayeed-te Assembly session-ah sûn an ni

Mizoram Assembly session hnuhnung ber leh tun ṭum session inkara thi, Jammu & Kashmir chief minister Mufti Mohammed Sayeed leh Lok Sabha MP hlui Purno Aigitok Sangma, Meghalaya-te chu nimin Assembly session-ah sûn an ni. Sun nan minute khat chhung ngawi rengin an ding.

Mitthite chanchin sawitu chief minister Lal Thanhawla tarlan danin, Mufti Mohammed Sayeed hi January 12, 1936-ah Jammu & Kashmir-ah a piang a, kum 1951-ah politics-ah a lut. Kum 1962-ah MLA atan thlan a ni a, ṭum eng emaw zat MLA-a thlan tlin a nih hnuah kum 1986-ah Rajya Sabha MP-ah thlan tlin niin, Cabinet minister a ni. Kum 1987-89 chhungin Home Minister a ni a, Muslim zinga Home Minister hmasa ber a ni.

MP a nih hmain kum 2002–05 chhung khan J&K chief minister a ni a, kum 2015 khan chief minister ni lehin, January 7, 2016-a AIIMS, Delhi-a a thih ni thlengin CM a ni.

PA Sangma chu September 1, 1947-ah a piang a, kum 30 a nihin Lok Sabha MP atan thlan a ni a, MP-ah hian ṭum kua thlan tlin a ni. MP a nih chhungin Cabinet minister-te a nih bakah, kum 1996 khan chuhtu awm loin Lok Sabha Speaker atan thlan a ni. Ṭum eng emaw zat MP a nih bakah, kum 1988-90 chhung khan Meghalaya Chief Minister a ni bawk. March 4, 2016 khan New Delhi-a a inah lungphu châwlin a thi a ni.

PA Sangma hian hmasa ber nihna a nei nual a, chungte chu - Lok Sabha speaker atana lungrual taka thlan hmasa ber, Kristian zinga Lok Sabha speaker hmasa ber, speaker naupang ber leh tribal zinga cabinet minister hmasa ber a ni.

CM Lal Thanhawla chuan, Mufti Mohammed Sayeed chu India ram tana mi uiawm a nih thu sawiin, "J&K hi India rama awm duh leh Pakistan lama beh duh iner reng a ni a, ani chu India rama beh duh tlat a ni. A thih hnuin J&K-ah sorkar mumal a piang thei hrih lo a, hei hian mi ropui tak a nihzia a tarlang," a ti.

PA Sangma chungchangah Lal Thanhawla chuan, Mizoram vawi tam tak a tlawh tawh tih a sawi a, "Mizoram hi a fang kim hle. A theih ang angin Mizoram hi min duhsak ṭhin a ni," a ti.

Opposition group leader Vanlalzawma pawhin, Moham-med Sayeed Mufti chu tlang mite hriatthiamna ngah tak a nih thu sawiin, "Mizoram chanchin hre nalh thei a ni. India ram hruaitute zingah Mizoram hre miah lote an awm ṭhin," a ti a; Mufti nen an inhmuh ṭumin Mizoram chanchin chîk tak a zawh thu a sawi.

Vanlalzawma chuan, PA Sang-ma chu hmarchhak mite tana symbol a nih thu sawiin, "Hmarchhak state, a bik takin tlang mite zinga politician ropui ber zinga mi a ni. Mizoram chanchin mawi takin a sawi ṭhin a, kan chanchin ṭha lam sawi hi a tui ṭhin hle," a ti.