Mizoram Blind Society-te'n Ṭanpui turin Governor an ngen

Mizoram Blind Society (MBS) chuan March 15, 2016 khan Governor Lt. Gen. Nirbhay Sharma hnenah memorandum thehlutin, The Persons With Disabilities [Equal Opportunities Protection of Rights And Full Participation] Act, 1995, (PwD Act) chu a nihna ang taka Mizoram sorkarin a kalpui theih nana pui turin an ngen.

Larsap hnena memorandum an thehluh chungchangah hian MBS hruaitute chuan nimin khan Aizawl Press Club-ah thuthar thehdarhtute an kâwm a; PwD Act-in pianphunga rualbanlote tana hamṭhatna a siamte hmang vek tura sorkar laipuiin state hrang hrangte a hriattir tawh hnua kum 20 a ral hnuah pawh Mizoram sorkarina a la hman ve tak tak loh avangin memorandum an thehlut tih an sawi.

MBS hruaitute chuan, an thu thlente chu Governor-in uluk takin a lo dawng-sawng tih sawiin, Chief Secretary kal-tlanga theihtawpa hmalak a tum thu a lo hrilh niin an sawi a, "Rualbanlote tana theihtawp chhuaha hma la chhunzawm zel turin min fuih a, amah pawhin theihtawpa min puih zel a inhuam thu min lo hrilh," an ti.

MBS hruaiutute chuan, Mizoram sorkar gazette hman lai, kum 2007-a DPAR department-in a tihchhuahah mitdel leh ke pahnih chhiate sorkar hna group A leh B-te leh leh MCS-a luh a phalsak lo chu PwD Act Section 33 leh Indian Constitution Article 14 leh 16 [1] kalh a nih thu an sawi a, "Government of India gazette thar ber zûlzuia Mizoram sorkarin gazette a hman lai siamṭhattir turin kan ngen a ni," an ti.

MBS hruaitute sawi danin, NLUP, MGNREGS, PMRY loan, KVI loan, IAY leh AAY-ahte 3% aia tlem lo rual-banlo tana hauhsak tur a ni a, mahse Mizoram sorkarin quota dah ngai lo a; PwD Act Section 40 bawhchhiatna a ni.

MBS hian an memorandum copy chu Mizoram Chief Minister, Social Welfare Minister, Chief Secretary leh Mizorama tlawmngai pawl hrang hrangte leh Mizoram Kohhran Hruaitu Committee chairman hnenah an pe tel a ni.

An hmalaknate'n awmzia a neih loh zel chuan a ṭul dan angin sorkar laipuiah memorandum thehluh an tum tih an sawi bawk.