MLA-te'n HIV/AIDS chungchang an zirho

Mizoram State AIDS Control Society (MSACS) chuan nimin khan Assembly House Annexe recess room-ah MLA-te pualin HIV/AIDS leh Health Care Scheme chungchang zirhona an buatsaih a, MLA-te an tel ṭha hle. He hunah hian December 2016 thlengin Mizoramah HIV hrik pâi 11,001 an awm tawh tih tarlan a ni.

Chief minister Lal Thanhawl-a chuan thu sawiin, Mizoramin India rama ber kaina chhe tak tak a neihte titlem turin beihpui thlak a ṭul tak zet tawh tih a sawi a, "Za zela chhûtin India ramah zûk leh hmuam kan ti nasa ber a, vaihlo kan hman nasat avangin cancer vei pawh kan tam ber. HIV positive pawh za zela chhûtin India ramah pahnihna kan ni bawk," tiin, MLA-te chu ṭhahnemngai lehzuala a do hna thawk tur leh an thusawina hmun apianga mipui zirtir turin a sáwm a ni.

Zirhona hi Health minister Lal Thanzara, Legislative Forum on AIDS (LFA) chairman-in a kaihruai a, LFA secretary Dr K Beichhua'n LFA hmalak dan tlangpui a sawi. MSACS project director Dr Lalmalsawmi Sailo-in HIV/AIDS chungchang sawiin, Mizoram State Health Care Society CEO Dr Biakthansangi'n Health Care Scheme chungchang a sawi.

MSACS Project Director sawi danin, tun dinhmunah Mizoramah HIV hrik pâi mek chu Mizoram mihring zat aṭangin 0.67% a ni a, India ramah pahnihna a ni. December 2015 thlengin Mizoramah HIV hrik pai mi 11,001 hmuh chhuah an ni tawh a, chungte chu mipa 6,930 leh hmeichhia 4,071 an ni.

MLA term kal laiah July 7, 2015 khan MLA kalkhawmte'n LFA an din thar leh a, chairman leh secretary bakah executive committee member 12 an awm. HIV/AIDS dona atan MLA fund aṭangin Rs. 1,00,000 ṭheuh thawh an remtih angin, MLA 40-te'n an thawh tawh a ni.

MLA-te sum thawh Rs. 40,00,000 chu January 27, 2016-a Health Minister hoa LFA ṭhu-
khawmin an rel angin, CD4 Count machine, hriau (syringe leh needle), condom, STI damdawi, blood donation campaign atan leh ṭul dang atana hman tura tih a ni.