PRISM-in Supply Minister bàn turin Chief Minister ngen

PRISM chuan nimin khan chief minister Lal Thanhawla hnenah lehkha thehlutin, Food, Civil Supplies & Consumer Affairs minister John Rotluangliana chu ration card tharah dik lo tam lutuk avangin bàn turin an ngen.

National Food Security Act (NFSA) hmanna tura ration card siamah dik lo nasa tak a awm tih sawiin, PRISM chuan, hamṭhatna dawng tura thlan zingah dawng thei lo (ineligible) tam tak an awm a, chutih laiin hamṭhatna dawng thei si dawng tura thlan loh tam tak an awm niin an sawi.

PRISM chuan, ration card-ah information dik lo a tam hle tih sawiin, "Mipui náwlpui ration card a dik lo ni mai loin, nangmah ngei pawh ration card dik lo siamsak i ni. Mizoram mipui tam berte identity an tikhawlo vek a; ration card a dikzia tihchhianna tur ni awm taka an dah ‘bar code’ hi bar code scanner hmang pawha hmuh theih loh, awmze nei tak tak lo a ni a. Hmantlak loh ration card siam nan hian mipui pawisa tam tak awmze nei loin an khawhral a ni.," an ti.

Ration card-a thil dik lo awm leh ration card buaipuinaa thil dik lote chu Mizorama sorkarin thil a tih dik loh zinga la nasa ber nia an ngaih thu sawiin, PRISM chuan, mawhphurtu bulpui, Supply minister John Rotluang-liana chu bàn turin Chief Minister an ngen a ni.