Chief Minister Lal Thanhawla'n TIST a hawng

Zirna sikul leh a kaihhnawih chung-changa hriattur pawimawhte vantlang en theih tura pho chhuahna, Total Information on Schools and Teachers (TIST) chu nimin khan chief minister Lal Thanhawla'n Assembly House Annexe recess room-ah a hawng.

Chief Minister chuan, information technologyah hmasawnna a awm mek tih sawiin, "Tunah chuan Mizoram chhung mai ni loin, India ram leh khawvel hmun hrang hrang thlengin IT kaltlangin inbiakpawhna bakah, hriat duh zawng en theihna a chakin a ṭha em em tawh a, Mizoram hmasawnna leh hmasawn lohna ngei pawh hian thlir a hlawh a ni," a ti.

Lal Thanhawla chuan, thingtlang kilkhâwr tak thlenga mamawhte en theih leh chhawr ṭangkai tur hmasawnna chhawp chhuah a ni leh TIST buaipuina kawnga hmalatute hnenah lawmthu a sawi a ni.

School Education minister H Rohluna pawhin thu sawiin, TIST software hmangin sikul hrang hrang awmna awlsam taka hmuh theih tura ruahman a ni tih a sawi a, "School mapping aṭang hian sikul dinhmun, naupang awm zat, zirtirtu zat leh tute nge an nih tih bakah, school academic record kimchang hmuh theihin a awm dawn a ni," a ti.

H Rohluna chuan, HSLC leh HSSLC exam thei tur thlanna, selection test/exam tihtawp a nih avangin kuminah private candidate nasa taka an tlem thu sawiin, "Kuminah HSLC-ah candidate 4,767-in an tlem dâwrh a, HSSLC-ah pawh 2,637 laiin candidate an tlem zawk," a ti. Kum 2016-17 academic session aṭanga hman ṭan turin evaluation scheme thar HSLC leh HSSLC atan siam a nih thu sawiin, scheme thar hnuaiah chuan external exam-in mark 80 leh internal evaluation/exam-in mark 20 a put dawn thu a sawi bawk.

TIST software hi online software a nih vangin thuneitute'n khawi hmun aṭang pawhin sikul leh zirtirtu dinhmun kimchang englai pawhin an hmu thei dawn a; software-a information awmte chu a hmu theitu tur chin leh an hmuh theih chin bithliah felfai taka siam a nih avangin information pawimawhte chu a hmu lo turin an hmuh palh tur a veng thei dawn a ni.