Ration card dik loh chhan sawifiah April 2016 chhunga siamthat tum

Food, Civil Supply & Consumer Affairs (FCSCA) minister John Rotluangliana chuan, nimin khan Assembly House-ah ration card siam thar dik loh chhan a sawifiah a, "April thla chhung ngeiin siamṭhat kan tum," a ti.

MNF member Dr K Bei-chhua zawhna chhangin John Rotluangliana chuan, National Food Security Act hman a nih avanga ration card siam tharah dik lo tam tak a awm chu pawi an tih thu a sawi a, "Kan inen lêt chho mek a ni," tiin, DCSO leh local council/village council-te chu ration card dik lo zawng zawngte tidik vek tura hriattir an nih thu a sawi.

Ration card dik loh chhante sawiin Supply Minister chuan, "L/C leh V/C-te ration card-a chhungkaw hming ziah luhna tur sem turin kan pe a, ṭhenkhat chuan sem loin an lo fill-up tawp a ni. Ṭhenkhat chuan ration card hi a siam hun laiin an ngaihsak lo a, a rawn chhuah hnuah an ngaihven leh si a, an lo awm lo a ni," a ti.

John Rotluangliana sawi danin, ration card atana hming ziah luhna tur an semah pian ni, thla leh kum dik ziah lan a nih loh chuan an software hmanah a dik thei lo a ni. Ṭhenkhat chuan an pian kum ringawtte an ziak a, chu vang chuan January 1-a piang ang vekin a chhuak a; pian ni, thla leh kum ziak lote chu YYY tih a ni.

Chhungkaw tam tak chu ration card atana thil pawimawhte ziahna tur LC/VC-te'n pe lo a, anmahni thua an lo ziah luh avangin an chhungkuaa mithi tawhte leh an chhungkuaa cheng tawh lote ration card siam tharah a chuang leh a ni.

Supply Minister chuan, ration card tharah chuan sorkar laipui thupek angin chhungkuaa hmeichhe upa ber hming ziah hmasak ber tur a ni tih sawiin, "Chhungkaw ṭhenkhatin hming hmasa berah mipa hming an ziah lan avangin relationship-ah buaina a awm a ni," a ti.

Ration card chhutna atan cheng nuai 75 an dawn thu sawiin Rotluangliana chuan, "Department aṭangin Rs. 10 zelin kan khultir a, LC/VC ṭhenkhat chuan ration card buaipuinaah an insên nasat thu sawiin, Rs. 20-tein an lo khultir a ni," a ti a; Rs. 20-a khultir chu an hriatpui loh thu an sawi.

John Rotluangliana chuan, ration card la dawng lote chuan an buhfai chan tur an chang dawn tho tih sawiin, "An ration card hmasa hmanga an quota tur pek tho turin order chhuah a ni tawh. An ration card a chhuah hunah siam rem leh mai tur a ni ang," a ti.