MNF party zawm an intihhmuh mek: Zorama

MNF party chuan nimin khan Mizo Hnam Rûnah an party zawm tharte lawm luhna in-khawm an hmang a; an presi-dent Zoramthanga'n thu sawiin, mipuiin mahni awmna sa party chhuah-san a, MNF zawm an in-tih-hmuh mek niin a sawi.

Zoramthanga chuan, tuna Mizoram sorkar kal dan chu a chiang kuang lo hle nia sawiin, "Ration card siam tharah Chief Minister ber pawh sorkar hnathawkah an chhuah a, a mumal lo em em. Zu man aṭanga chhiah cheng vbc. 40 an lak luh an chhuangte hi thil chhuanawmah keini chuan kan ngai lo," a ti.

MNF President chuan, HPC(D) demand area chhunga khaw hrang hrangah tun thlenga V/C inthlan a la ni lo chu mak a tih thu sawiin, "HPC(D)-te’n thuchhuah siama kan tibuai tawh lo ang, an tih hnuah pawh thla riat a liam leh tawh chunga inthlan an buatsaih thei lo hi a mak hle," a ti a; dan leh thupek kenkawng kawngah Congress sorkar chu a chau tak zet niin a sawi.

Nikuma Myanmar tuilian tuartu Zo hnah-thlakte ṭanpui nan koh-hran leh NGO-te'n sum tam tham tak an thawh laia Mizorama Congress sorkarin eng tham mah a thawh ve lo tih sawiin, Zoramthanga chuan, "Heta tang ringawt pawh hian Congress sorkar hi Zoram mipui leh khawvel hian eng ang chiah nge a nih kan chiang hle a ni," a ti.

MNF thuchhuah chuan, Police leh Educa-tion lama officer pension eng emaw zat chu an party-ah an lawm lut niin a tarlang.