Mizoramah Public Relations Society of India a ding ta

Public Relations Society of India (PRSI), Mizoram chapter chu March 18 (Ningani) tlai khan I&PR Auditorium, Aizawl-ah din a ni. PRSI National President Dr Ajit Pathak-in a hawng a, hruaitu an ruat nghal a ni.

He hun hawngtu Dr Ajit Pathak chuan, "PRSI hian India ram hmun hrang hrangah hna ṭangkai tak tak a lo thawk tawh a, tunlai khawvelah public relations siam thiam lo tan hnathawh hleitheih a ni tawh lo a, chuvangin pawl pawimawh tak a ni. India ram kil tina inzarpharh zel kan duh a, Mizorama kan pawl a ding tur hi kan phur takzet a ni," a ti.

PRSI National Pre-sident chuan Mizo ṭhalaite a hriat chian thu leh an hawiher leh an che vel a changkan thute, English an thiam avanga public relations kaihhnawih hna hrang hrang thawk tura ram puma hman theih tur an nih thute a sawi a, "Theihna in neih hi PRSI a din hnuah ṭha zawkin in chhawr ṭangkai theih ka beisei," a ti.

He hun hmang tura Guwahati aṭanga lo kal PRSI Vice-President (East) M S Mazumdar pawhin thu sawiin Mizo-rama PRSI din a ni chu lawmawm a ti a, "India hmarchhakah Assam-ah chiah a la ding a, Mizo-rama a ding thei hi a lawm-awm takzet a ni," a ti a; PRSI kalphung leh a inrelbawl dante a sawifiah bawk.

PRSI hi 1958-a din kha a ni a, public relations kaihhnawia eizawnna tam zawk siam a, hemi lama inhhmangte ṭha zawka an inthlunzawm theihna tura din a ni a; April 21- hi National Public Relations Day-a hman ṭhin a ni.

PRSI, Mizoram Chapter hruaitu ruat tharte chu:

Chairman - Lal-nghing-lova Hmar, Joint Editor Vanglaini; Vice Chairman - LR Sailo, Nodal Officer, IIMC Mizoram; Secretary - Irene Lalruatkimi, Asst Professor, Mass Comm, MZU; Joint secretary - Lalfakzuala, MIS; Treasurer - William Lal-ramhmachhuana, Asst Professor, Mass Comm, MZU te an ni a, executive com--mittee member mi paruk an ruat bawk.