Term 3 sorkar theih loh chhan tur a awm lo - Lal Thanhawla

Congress party chuan nimin khan Congress Bhavan-ah tun hnaia Public Affairs Centre, Bengaluru-in India ram state tê 12 zinga good governance-a ṭha bera Mizoram a thlan lawmna hun an hmang. MPCC president Lal Thanhawla chuan, term thum an sorkar theih loh chhan tur a awm loh thu a sawi.

Lal Thanhawla chuan, thingtlang leh khawpuiah an party an pung zel nia sawiin, "Tute'n emaw Mizoramah term thum a sorkar theih loh anga an sawi fo hi India ram state dangah pawh a theih avangin Mizoramah a theih loh chhan tur a awm lo," a ti.

Finance minister-in kum 2016-17 atana Mizorama budget tur a pharh chu Mizorama budget ṭha ber zinga mi a nih thu sawiin, Lal Thanhawla chuan, a kaihhruai sorkar chu eirukna emaw, kut tling loa sum hai luhnaah puhna tur a awm loh avangin party dangte'n dâwt hmangin an sawichhe ṭhin niin a sawi.

MPCC President chuan, sorkarna an chelh hnuah Mizorama maute humhalh kawngah theihtawp an chhuah tih sawiin, "Mau hi lehkhapuan siam nan a hlâwk lo a, khawchhak lamah thawmhnaw leh lapaw ṭha chi siam nan an hmang nasa a, chutiang siam ṭhin company lian, Mumbai-a inbunte nen inremna ziak turin hmalak mek a ni," a ti.

Finance minister Lalsawta pawhin thu sawiin, "Good governance teh-khâwnga Mizoram pakhatna a nih theih chhan chu state ralmuang kan nih vang a ni," a ti a; kum 1998-2008 inkara MNF sorkar laiin Mizoram chu a rálṭitna hmunah a chang hman a, mahse Cong-ress a sorkar leh hnuah state ralmuangah a chang leh ta niin a sawi.

Congress party thuchhuah chuan, nimina inkhawmah hian MPCC Pre-sident-in an party-ah Hrangbana College-a associate professor pension ta Sangdeli a lawm lut niin a tarlang.