KHAWTHLIR

Earth Hour

UNO hnuaia pêng pakhat, World Wildlife Fund (WWF) hmalaknain vawiin hian khawvel pumah kawlphetha renchemna kawnga hmalakna pakhat, ‘Earth Hour’ hman leh a ni dawn. Earth Hour hi India ramah chuan zanin dar 8:30 leh 9:30 inkarah hman tur a ni a, hemi chhung hian kawlphetha hmang chi reng reng off turin mipui an ngen a ni.

MPF training

Mizoram People Forum (MPF) chuan, March 16, 2016 aṭang khan Administrative Training Institute (ATI)-ah sorkar inrelbawlna ṭha chungchanga zirhona an buatsaih a, nimin khan khâr a ni. Training-ah hian kohhran hrang hrang aiawh leh MPF constituency forum hruaitute an tel.

Lirtheia chetsualnaah thi

Nimin zing dar 7 vela Hnahthial Chanmari-a lirtheia chetsualnaah Lalhriatpuii (13) d/o Ramdinmawia, Hnah-thial Chanmari chu a hliam a, zing dar 8:30-ah a hliam tuar loin Hnahthial damdawi-inah a thi. Thu dawn danin, Lalhriat-puii hi taxi lîrin a hrût a, a bekah a hliam a ni.

Storekeeper leibá

FCSCA minister John Rotluangliana chuan, Supply department-a storekeeper leiba nei mi 61 an awm thu a tarlang. MNF member Dr K Beichhua zawhna chhangin John Rotluang-liana chuan, storekeeper 61-te leiba belhkhawm chu Rs. 13,86,47,440 a ni tih a sawi a, "Storekeep-er zingah hian eirukna avanga thubuai nei an awm lo," a ti.

Lungin delh hlum

Ningani chawhma dar 9:30 vel khan Vanthanga (33) c/o Lalbiakthanga, Serchhip Sailiam Veng chu Serchhip leh Thenzawl inkara quarry-a hna thawk mek chu a chhak lama lung tlain a delh a; Serchhip District Hospital thlenpui a nih hnuah a hliam tuar loin a thi.

Zirlai thlah

National Institute of Electronics & Information Technology (NIELIT) chuan, nimin khan Lal Thanhawla Auditorium-ah an zirlai kal chhuak turte thlahna hun an hmang a; Information & Communication Technology minister Lal Thanzara'n a hmanpui.

Skill Qualification Framework zirho

Nimin khan Planning department conference hall-ah Planning Board member-secretary (i/c skill development) Haukhuma Hauzel kaihhruaiin National Skill Qualification Framework chungchang zirho a ni. Training-ah hian MSDS project director Daniel Hauhnar-in thil pawimawhte a sawifiah a, sorkar department 17 aṭangin officer-te an tel.

ABFPI workshop

Agro Base Food Processing Industry chuan, nimin khan Chanmari YMA Hall-ah Entrepreneurship Motivation Workshop an buatsaih a, parliamentary secretary (Industries) Joseph Lalhimpuia'n a hmanpui.

RUSA zirho

Nimin khan Aizawl North College chuan an college-ah RUSA chungchang zirhona an buatsaih. Dr Zarzoliana, Joint State Project Director hnen aṭangin RUSA kalphung ngaihthlak a ni.