Bawlhhlawh bâwm 1,23,950 sem tawh

UD&PA minister Zodin-tluanga chuan, February 25, 2016 thlengin chhungkaw 61,975 hnenah bawlhhlawh bâwm 1,23,950 sem a nih tawh thu leh, chhungkaw pakhatah bawlhhlawh bâwm pahnih zel pek a nih thu House a hrilh.

MNF member Lalrinawma zawhna chhanga Zodintluanga tarlan danin, bawlhhlawh bâwm chu ṭawih thei leh ṭawih thei lo atan litre 20 dawng ve ve turin ruahmanna an siam a; mahse DPR an pawmpuinaah litre 20 tih chu litre 10-in Ministry of Urban Development-in a thlak a ni.

Litre 10 dawng bawlhhlawh bâwm chu pakhat Rs. 186.86 zela lei a ni a, tun dinhmunah bawlhhlawh báwm leina atan hian Rs. 2,31,61,297 sen a ni tawh.

Zodintluanga sawi danin, Aizawl khawpui bawlhhlawh hi ni tin ton 159.88 a ni a, mihring 3,19,837 awm anga chhût niin, mi pakhatin bawlhhlawh gram 495 paih ziah anga ngaih a ni.

Chhungkaw pakhatah mi-hring pali leh tlem (4.84) cheng anga ngaih a ni a, chhungkaw pakhatin ni tin bawlhhlawh kg. 2.395 nei ziah angin an chhût. Bawlhhlawhte chu litre 10 dawng bawlhhlawh báwm pahniha dah theih turin Ministry of Urban Development chuan a ngai a ni.