NIA-in mi firfiak puitua puh zingah Mizo a tel

National Investigation Agency (NIA) chuan, firfiak (terroist) pui tua puh mi pali lakah thubuai an thehlut a, an zingah hian Rohmingliana, Vaivakawn Zohnuai, Aizawl a tel.

Rohmingliana hi firfiakte hnena ralthuam pea puh a ni a, ani hi Mizorama mi firfiakte puitua puh vanga thubuai siamsak hmasa ber nia hriat a ni.

Mizoram police CID (Crime)-te leh 26 Assam Rifles-te chuan March 7-8, 2013 khan Lengpui bula thlám pakhatah ralthuam eng emaw zat an man a; an ralthuam mante chu AK-47 rifle 31, LMG pahnih, sniper rifle pakhat leh silai mu 1,809 a ni.

NIA special public prosecutor C Zoram­chhana'n The Frontier Despatch palai a hrilh danin, ralthuam an manna thlâm neitu chu Rohmingliana a ni a; ani bakah hian ralthuam neitua puh Bangladesh lam mi pathum - Moni Tripura, Sobuj Chakma leh C Lalnghakthanga te chu man an ni.

Mi palite hi Arms Act Section 25(1AA) leh Unlawful Activities (Prevention) Act Section 23(2) hmangin thubuai siamsak an ni a; thiam loh an chan chuan kum 17 thleng tàn theihna a nih thu an sawi.

C Zoramchhana sawi danin, Lengpui daia ralthuam man thubuai hi NIA chuan June 10, 2013-ah an la ṭan a, March 16, 2016 khan Lucy Lalrinthari ṭhutna Special Court-ah chargesheet an thehlut.

NIA chuan an chhui zuinaah, ralthuamte chu Pakhuanga'n Tahan, Myanmar aṭanga a lak a ni a, 407 truck hmangin Leng­pui dáia Rohmingliana thlámah phur thlengin, Rohmingliana hnenah a hlan a; Rohmingliana hian Bangladesh lama keng thlatu tur Moni Tripura, Sobuj Chakma leh C Lalnghakthanga te chu a mikhual a ni.

NIA-te chuan ralthuamte chu Bang­ladesh-a inkulh Chakma hel pawl, PCJSS hnena pek tur niin an hria a ni.

NIA-te hian December 2, 2013-a Khaw­lailung bula silai eng emaw zat man thubuai pawh an chhui mek nia thu dawn a ni.