KHAWTHLIR

Thisen pe

Seventhday Adventist ṭhalaite chuan, Inrinni khan Global Youth Day pualin Aizawl leh Saihaah thisen unit 121 an pe. Aizawlah chuan mipa 86 leh hmeichhia 11-in Aizawl Civil Hospital tan unit 97 an pe a; Saihaah mipa 11 leh hmeichhia 13-in Saiha District Hospital-ah unit 24 an pe a ni. Inrinni vek khan Lunglei Chanmari bial ṬKP-te chuan Lunglei Civil Hospital-ah thisen unit 51 an pe a, a petute mipa 40 leh hmeichhia 11 an ni. Tanhril Branch KṬP pawhin an diamond jubilee lawm nan Synod Hospital-ah unit 31 an pe a, a petute mipa 28 leh hmeichhia pathum an ni.

Youth Club Award

Bilkhawthlir Kawnveng YMA chu Kolasib DC leh Kolasib district-a Nehru Yuva Kendra-te chuan, District Level Outstanding Youth Club Award 2016 dawng turin an thlang. Lawmman hian Rs. 25,000 leh thuchei a keng a ni.

Mental health

Health department hnuaia National Mental Health Programme leh Light for Comprehensive Development ṭang-
kawp chuan, Inrinni khan Zemabawk YMA Hall-ah Mental Health Awareness Programme an buatsaih. A thlawna inentirna an buatsaih nghal bawk a, mi 200 vel an inentir a ni.

In kâng

March 18, 2016 zan dar 8:15 khan Lawipu venga F Malsawmtluanga in, RCC leh Assam Type-a sak chu a kâng a, bung-rua chuh hman lohin a kâng ral. Inrinni zan zanlai vel khan Lunglei Zotlanga Lalsangpuia in chu bungraw chuh hman lohin a kâng ral nia thu dawn a ni bawk.

FIFA palai

Dr Eric Harrison, FIFA Consultant for Artificial Turf chuan Sairang Dinthara MFA khel-muala FIFA-in artificial turf an phah dan tur endik turin vawiin hian Mizoram a rawn tlawh dawn.

Kawng siam phût

Dampa group YMA chuan March 17-18, 2016 chhung khan Damparengpuiah Group YMA Conference vawi 44-na an hmang a, YMA CEC member JH Zoremthanga'n a hmanpui. Rorel inkhawmah, Mamit leh West Phaileng inkar kawng siam-
ṭha turin sorkar nawr ni rawh se, tiin an rel.