HSLC exam pualin kawlphetha lei belh

March 1-20, 2016 chhung khan Mizoramah High School Leaving Cetificate (HSLC) Examination 2016 neih a ni a; exam chhungin Mizoramah kawlphetha lamah harsatna a awm loh thu leh, zirlaite'n ṭha zawka lehkha an zir theihna turin Power & Electricity department chuan phai aṭangin kawlphetha Rs. 50,66,766 man an lei belh.

P&E department hotute chuan, HSLC exam dawn avangin zirlaite'n ṭha taka lehkha an zir theih nan theihtawpin ṭan an la tih an sawi a; P&E engineer-in-chief L Pachuau pawhin Serlui-B HEP aṭanga kawlphetha pek chhuah theih nan hma a la tih sawiin, "Tun dinhmunah line chhia leh harsatna bik a thleng thut a nih loh chuan exam laiin power supply mumal lo a awm lo ang," an ti.

P&E hotute sawi danin, HSLC exam laia power supply ṭha tak a awm theih nan Mizoram sorkarah electric current lei belhna tur an dil a, sorkar chuan February 29, 2016 khan Rs. 50,66,766 hman a phalsak a ni. P&E chuan March 1 zan dar 12-a hman ṭan turin India Energy Exchange kaltlangin power an lei nghal a, matric exam chhungin power supply a khaihlak lo tura ngaih a ni.

India Energy Exchange-a power an lei dan hi sawifiahin P&E hotute chuan, "Mamawh zual lai, peak hour kan tih mai tlai dar 4 leh zan dar 10:30 inkar leh zing dar 6 leh dar 9 inkar hian megawatt 8.14 thleng kan lei belh. Ni tin hman tur bik lei zel a ni a, zan dar 12 aṭanga hman tur hi kan lei belh dawn a nih chuan a hma ní chhun dar 11:30 hmain hriattir phawt zel a ngai. Minute 15 dan zelah kan mamawh dan kan hriattir zel a ngai a, department hnathawkte hi darkar 24 an thawk a ni," an ti.

P&E enginner-te chuan HSLC exam laia power supply ṭha tak a awm theih nan E-in-C L Pachuau pawh a thawkrim hle tih sawiin, "Serlui B-ah amah ngei kalin, a
ṭul ang apiang a thawk. A hmunah riahchilhin khawl pahnih aṭangin megawatt 8 a pek chhuah phah a, hei hian phai lam aṭanga power lei belhna sum pawh a chhawk nasa hle," an ti a; Indian Energy Exchange aṭanga power leina tur sorkarin a pek laiin, Serlui-B aṭanga megawatt 8 pek chhuah belh theih dawn leh dawn loh an la hre lo.

Serlui-B HEP-ah E-in-C hoa hma an lak avangin phai aṭanga an lei belh tur nasa takin a tlakhniam phah a, Serlui-B tel loin a tirah chuan ni khatah Rs. 1,63,444 sêng tura ngaih a nih laiin, Serlui-B aṭanga power supply an hmuh leh tâk avangin ni khatah Rs. 68,796 chiah an sen phah a ni.

P&E hian March 18, 2016 thleng khan Indian Energy Exchange aṭangin Rs. 12,38,320 man kawlphetha an lei a ni.