2017-18 ah Sainik School ṭan tum

Minister H Rohluna chuan, Inrinni khan Chhingchhip rama Sainik School building sak mek chu a tlawh. Sainik School hi academic session 2017-18 ah ṭan tum a nih thu an sawi.

H Rohluna hian Sainik School building satute chu kâwmin, an hnathawh dante a zawt a; hna thawktute'n lo dawngsawngin an hnathawh dante an lo hrilhfiah. An sawi danin, kumin July thlaah hostel building ṭhenkhat, academic building-te leh mess room turte sak pum theih an inbeisei a ni.

Sainik School hi kum 2017-18 session-ah ṭan tum niin, Class-VI ṭan theih an inbeisei a, kum tin class hawn belh zelin, pawl 12 thleng hawn tum a ni. Class tinah zirlai 60 zel an awm ang.

School Education minister H Rohluna hian Inrinni vek khan 3rd Hualliana Memorial Football Running Trophy 2016 khârna inkhawm a hmanpui a; thu sawiin, Mizoramin infiamna lamah nasa takin hma sawn a, tun kum 6/7 chhunga hmasawn ber state a nih thu a sawi.

H Rohluna chuan, I-League khelh mekah team hrang hranga state pakhat aṭanga khel zingah Mizoram chu player ngah ber a nih thu sawiin, "Infiamnaa hlawhtling turin tih tak takna leh insûm theihna leh taksa tihhrisel a ngai a, tun aia nasa lehzuala infiammite'n ṭan an lak a ngai a ni," a ti.