Natna khirh bikte inhrilhriatna buatsaih

National Programme for Prevention and Control of Cancer, Diabetes, Cardiovascular Diseases and Stroke (NPCDCS) leh National Programme for Prevention and Control of Deafness (NPPCD) leh AIKO-te chuan, Inrinni khan Hunthar Veng MHIP Hall-ah Non-Communicable Diseases (NCD) Aware­ness Campaign & Scree­ning Camp an buatsaih a, Health minister Lal Than­zara'n a hmanpui.

Health Minister chuan, hriselna chu mahni kutah thui tak a awm tih sawiin, "Ei leh in bakah, zûk leh hmuam lamah kan insûm a ngai hle. Mizote hi Kristian kan nih angin hrisel hle tura beisei kan nih laiin, India rama a chhe zawnga a ber nihna kan hauh hi a zahthlak hle a, kan inthlah­dahin sim tur kan nei tih i hrechhuak thar ang u," a ti.

Health department-in a vei ber chu HIV/AIDS a ni tih sawiin Lal Thanzara chuan, "Kan hriat leh hmuh theih aia nasa hian min luhchilh mek. Tun hma chuan drug vangin miin HIV an kai
ṭhin a, tunah erawh chuan mipat hmeichhiatna hman khawloh avangin kan kai mek a ni," a ti a; HIV/AIDS chu tih tak zeta do a nih loh chuan kum nga a ral leh meuh chuan do zawh loh khawpa nasa a nih tawh tur thu a sawi.

NHM director Dr K Lalbiak­zuala pawhin thu sawiin, khawsak zia chang­kang zel vangin kum 2008-09 aṭangin zunthlum, thisen sang, stroke leh natna dangte a tamzia leh a veite an naupang telh telh thu a sawi a, "Kum 30-40 kal ta aṭang khan sorkarin health programme eng emaw zat kalpui tawhin, natna chi hrang hrang tihrêm a lo tum tawh a. Tunah hian NCD-te tihrêm bakah infinchhuah a tum leh mek a ni," a ti.

NCD Awareness Cam­paign & Screening Camp-ah hian doctor te, physio­therapist te, dietician leh beng enkawl thiam bikte'n a thlawna inentirna an hawng a, damdawi a thlawnin an sem bawk.