Ram leh hnam tana ṭha turah Sorkarin sum pûk zel inhuam

Nimin Assembly session-ah budget a tlangpuia sawiho a ni a, Chief minister Lal Thanhawla leh Finance minister Lalsawta te chuan, ram leh hnam tana ṭha turah chuan tîm hauh loin sum an pûk zel an inhuam an sawi.

Chief Minister chuan, ram leh hnam ṭhatna tur a nih chuan eng zat pawh ni se, an bat zel tur thu sawiin, "Ram leh hnam ṭhatna tura batna tur kan la nei leh, ba theia kan la awm hi a lawmawm hle," a ti a; budget piah lamah pawh ram hmasawnna atan chuan a ṭul angin bat zel an inhuam thu a sawi.

Lal Thanhawla sawi danin, Mizoram sorkar chuan thlen chin aṭanga hmasawn turin ngaihtuahna nasa takin a sêng a, chumi atan chuan New Economics Development Policy (NEDP) an duang chhuak a ni. NEDP hi mi hlawhtling tawhte sawhnghehna tur leh a hlawhtling lote dâwmkânna tur a ni.

Finance Minister chuan, leibat chu tihtlem tum ni mah se, ram tana ṭha tur a nih chuan bat tîm tur a ni lo tih a sawi a, "Investment ṭha tur atan te, ṭhalaite'n hna an hmuh theihna tur atan te, zirlaite kawng sialna atante leh ram tana ro tling siamna tur atan chuan kan pûk zel ang," a ti.

Lalsawta chuan, budget an siam dawnin an árkhawthimdâi mai mai lo tih sawiin, "Kan pawisa hman dan tur leh kan kal dan tur ngaihtuahin kan ṭhukhawm zel a, thawhhona kan nei ṭha tak zet a ni," a ti a; kum 2016-17 atana budget an ruahman chu fak tlak nia a hriat thu a sawi.

Mizoram budget-in mipuia sorkar mawhphurna a paw chhuak tur a ni tih sawiin Lalsawta chuan, "Chumi tur chuan theihtawp kan chhuah a ni," a ti.

Finance Minister chuan, Mizo mipuite'n dinchhuah an duh thu sawiin, "Chumi atan chuan budget hi kan siam. New Economics Development Policy aṭang hian mipuite dinchhuah theihna tur tam tak a awm," a ti a; budget chu dinchhuah châkte dinchhuah theihna tura buatsaih a nih thu a sawi.

Budget tlangpui sawihonaah hian member 14-in thu an sawi a; opposition group leader Vanlalzawma chuan, public sector undertaking (PSU) tihtawp a ni chu lawmawm a tih thu a sawi rualin, "Ṭhiah a nih tâk avanga hlâwkna awm hriat a châkawm. Ṭhenkhat hnathawhna sawn a, hlawh lakna thlak ringawtte a ang," a ti.