Reservation hnuaiah rualbanlo 44 sorkar hnaah lak a ni tawh

Social Welfare minister PC Lalthanliana chuan MNF member K Sangṭhuama zawhna chhangin, PwD Act hnuaia rualbanlote tana sorkar hnaa 3% hauhsak hnawhkhah nan rualbanlo mi 44 lak a nih tawh thu House a hrilh.

PC Lalthanliana sawi danin, tun dinhmunah mitdel sikul pakhat Special Blind School, Durtlangah a awm a; pawl 1 aṭanga pawl 10 thleng zir theih a ni. He sikul atan hian sorkarin zirtirtu 10 leh IV grade pakhat a ruai a, an hlawh chu sorkarin a tumsak vek a ni.

Tar pension la mek mi 25,469 an awm a; tar pension hi thla khatah kum 60-79 inkar hnenah Rs. 250 leh kum 80 chung lam hnenah Rs. 550 pek a ni. Sum hmuh dan azirin thla thum aṭanga thla li danah an pe ṭhin.

Social Welfare Minister chuan, tar pension chu September 2015 aṭanga March 2016 thleng pek a ni tawh lo tih sawiin, "Central aṭangin pawisa kan hmu tawh a, state matching share tur pawh hmuh a ni tawh. Tun thla chhung chuan sem tum a ni," a ti.