FIFA-in MFA khelmuala phullem phah dan tur endik

Mizoram Football Association (MFA) khelmual, Sai-rang Dinthara artificial grass phahna tur chu nimin khan FIFA consultant Prof. Eric Harrison chuan a enfiah. Nimin tlai khan chief minister Lal Thanhawla nen inkawmin CM hian Mizoram sorkarin a tih ve tur awmte ṭha taka a tih tur thu a lo hrilh.

Prof Eric hi khawvel ram hrang hranga FIFA-in artificial grass a phah tur endiktu ber a ni a, ram 72-ah artificial grass phah tawhin khawvela he mi kawnga thiamna nei sang ber anga ngaih a ni.

MFA hruaituten Eric Harrison hi lo dawngsawngin grass phah hmaa tihtur ṭul hrang hrang a hrilh a. A hmunhma laihzaute, a khelmual hawi zawng her rem hret leh a panna kawng laih zaute leh FIFA-in khelmual a chei dawna a duh dan ṭhen-
khatte a sawi.

FIFA consultant chuan Mizoram sik leh sa mila a tlo tur ber chi phah a nih tur thu a sawi a, Mizoram chu ruah tui tlak tamna hmun a nih vangin chutiang mil tur an thlan tur thu a sawi. Tlo leh ṭha thei ang bera enkawl a nih theihna turin a enkawltu turte training pek an nih tur thu a sawi a; MFA lamin he khelmual chei ṭha tura an inhuamnate an hrilh.

Nimin tlai khan chief minister chuan Dr Eric hi kawmin Mizoram sorkarin a tih ve ṭulte a zawt a, a hmunhma tihzau ngaite chu a rang lama zauh an tum tur thu a sawi bakah, "Sorkain tih tur a neihte chu phur takin a ti ang," a ti a; India ram hmun kilkhawr taka khelmual ṭha siam tura a lo zin avangin Dr Eric chu lawmthu a hrilh bawk.

Chief minister nen an inkawmnaah hian MFA president leh minister Lal Thanzara bakah honorary secretary Lalnghinglova Hmar-te'n an
ṭawiawm a ni.