Vote nuai 1 dawn kan la hûm: Lalduhoma

ZNP president Lalduhoma chuan, kum 2018 Assembly inthlanah ZNP-in thawhpui neiin sorkarna an siam ngei dawn niin a sawi a; an party chuan vote nuai khat dáwn an la hûm ve niin a sawi.

Nimina ZNP party pisaa inkhawmah thu sawiin Lalduhoma chuan, "Kum 2018 MLA inthlanah third front emaw, ZNP-in thawhpui neiin sorkarna kan siam ngei dawn a ni. Engtin nge kan siam dawn tih erawh tunah sawi theih ni rih lo mah se, ZNP-in a thawhpui apiang hneh takin sorkar a siampui ngei dawn. ZNP-in a thawhpui loh party chu kan rêp dawn a ni," a ti.

MNF chungchang sawiin Duhoma chuan, MNF leh ZNP chu tualṭo ve ve an nih avanga indîm tawn taka kalin MP inthlan hnuhnung berah pawh NDA angin an thawkho a; mahse, kum 2013 Assembly inthlan te, nikuma AMC inthlan leh MLA bye-election-ahte thawkho turin an sawm a, MNF lamin an duh loh avangin an thawkho thei ta lo niin a sawi.

Lalduhoma chuan, ZNP chuan vote nuai khat dawn lai an la hûm nia sawiin, "Inthlan leh huna sorkar siam tura kawngro su ber tur kan nih avangin, mahni opposition puite beih hi MNF-te'n an sim loh chuan an tan a la pawi hle thei a ni," a ti.

Ram leh hnam hmangaih tak taktute chu ZNP-a lut tura sáwmin, "Ṭhalai lehkhathiamte tan Youth Employment Scheme (YES) hmangin employment tam tak kan neihte hi chak taka kalpui a ni ang," a ti bawk.