Minister hoin Bairabi-ah rél hmuak

Bungraw phur chi rel lian chuan nimin khan Bairabi a lo theng a, Transport minister John Rotluangliana hoin sorkar mi pawimawhte'n an lo hmuak.

Rêl a thlen hnua Bairabi-a inkhawm buatsaihah Transport Minister chuan, Bairabia rél lian a thleng chu Mizoram tan hmasawnna a nih thu a sawi a, "Mizoram tan méllung pawimawh tak leh chhinchhiah tlak a ni. Mizo mipuite tan sawi nêp theih a ni lo. Railways lamin rel lian thlen hun tura an sawi March 2016 hi a tirah âwih mai a harsa a, vawiinah a tak ngeia hmuh theihin a lo awm ta a ni," a ti.

John Rotluangliana chuan, Bairabia rel lut hmasa chu duhkhawp a ni lo tih sawiin, "India ram khawpui liante tlawhtu rel lianin Mizoram a rawn tlawh takah chuan ram dangte nen pawh hmasawnna ah kan kal rual thei tawh ang," a ti a; relin bungrua a rawn phurh luh chu a phurh man a tlâwm avangin a hralh chhuah lehna pawh a tlâwm dawn thu leh a chhawrtu chu mipui an nih thu a sawi.

Rél hmuahnaah hian parliamentary secretary (Transport) TT Zothansanga, bialtu MLA PC Zoram Sangliana, Transport secretary Dr Franklin Laltinkhuma leh Kolasib DC H Lalengmawia te pawh an tel.

Rêl lian hian wagon 40-ah buhfai metric ton 2,600 a rawn phur thleng a ni.