KHAWTHLIR

GAC workshop

Govt. Aizawl College-a Sociology department leh History department-te chuan, nimin khan an college conference room-ah 'Special lecture on gender issue' tih thupui zirhona an buatsaih a; Prof. Geraldine Forbes, University of New York-in thu a sawi bakah, sawihona hun hman a ni.

Free clinic

March 20, 2016 kha World Oral Health Day a ni a, he ni denchhen hian Indian Dental Association, Mizoram State Branch chuan nimin khan Sialsukah free dental clinic an buatsaih. a, a thlawnin damdawi an pe.

Forestry Day

World Forestry Day pualin Environment & Forests department chuan nimin khan Bethlehem Vengthlanga Forest Training Institute-ah inrawnkhawmna hun an hmang a; principal chief conservator of forest Lalram Thanga'n a hmanpui.

RR siam dawn

Social Welfare minister PC Lalthanliana chuan, Person with Disabilities (PwD) commissioner tur lakna atan Recruitment Rules (RR) felfai tak siam a nih dawn thu House a hrilh a, "Tun tut tutah chuan PwD Commissioner hi lak theih a ni lo ang," a ti.

Lehkhabu tlangzarh

PUC-a Psychology dept-in kum 2014-a Mizorama chanchinbu mite tana “Suicide: Sensitization and Prevention for Media Professional’ tih thupui hmanga seminar an buatsaih kal zela lehkhabu an buatsaih chu, nimin khan MJA vice president Zonunsanga Khiangte-in Aizawl Press Club-ah a tlangzarh. Lehkhabu hi Dr Saichampuii, Dr Rinpari Ralte leh Lalropuii te buatsaih a ni.

e-Governance zirho

Centre for Innovations in Public Systems (CIPS), Hyderabad leh Administrative Training Institute, Mizoram ṭangkawp chuan nimin khan ATI auditorium-ah senior leh middle level officer-te tan ‘One Day Sensitization Workshop on Innovative/Best Practices in e-Governance under Mission Mode Projects' an buatsaih a, I&CT secretary C Lalhmachhuana'n a hawng.