MLA inthlanpui a inher chhuak ta; ram pumah voter 8,57,063 an awm

Mizoram State Legislative Assembly General Election vawi 9-na chu vawiin hian neih a ni dawn ta a, ruahmanna engkim peih a ni tawh. Tun ṭum inthlanah hian state pumah vote nei mi 8,57,063 an awm.

MLA inthlanpuiah hian zing dar 7-ah vote thlâk ṭan theih a ni dawn a, tlai dar 4 thleng vote thlak hun hawn a ni ang. Tlai dar 4 thlenga vote thlak hman lo, polling station huam chhunga awm hmante erawh chu dar 4 hnu lamah pawh vote thlâktir tum a ni. Vote thlâk tur hian mahni nihna tichiang thei voter identity card leh Aadhaar card emaw, identity card dang emaw ken a ngai.

Inthlan buaipuitu tur polling party zinga a tam zawk chuan nimin khan an enkawl tur polling station an pan a; polling station hla deuh, kawng ṭhat lohna hmun leh kalpawh harsa deuh enkawltu turte chuan November 5, Pathianni khan an awmna tur an pan tawh bawk.

Tun ṭuma inthlanpuiah hian voter 8,57,063 an awm a, mipa 4,13,062, hmeichhia 4,39,026 leh Mizoram pawna Mizoram mi sorkar hnathawk (service voter) 4,975 an ni. Constituency 40 zinga 30-ah mipa aiin hmeichhia an tam a, bial 10 - Hachhek, Dampa, Mamit, Chalfilh, Lengteng, East Tuipui, Thorang, West Tuipui, Tuichawng leh Lawngtlai West-ahte mipa an tam zawk thung.

Vote nei tamna ber bial Tuichawng constituency-ah voter 36,041 an awm a, Aizawl West-I (voter 29,803) leh Lawngtlai West (voter 29,495)-te'n an dawt. Vote nei tlemna ber chu Thoráng niin, voter 14,924 an awm a, Lunglei West (voter) 15,604 leh East Tuipui (voter 15,782)-te'n an dawt.

Mizoram electoral roll-a chuang mi 50,751 chu vote nei thar an ni a, vote nei zawng zawng 8,57,063 aṭangin 5.92% a tling. Voter zingah hian pianphunga rualbanlo mi 3,381 (mipa 1,875 leh hmeichhia 1,506) an awm a, kum 80 chung lam mi 8,486 leh kum 100 tling tawh mi 578 an awm bawk.

Mizorama Assembly constituency 40-ah polling station 1,276 awmin, khawpuiah 525 leh thingtlangah 751 a ni a, kum 2018 inthlanpui aiin 112-in a tam. PS 1,276 zinga 30 chu vil uluk bik ngai, critical polling station a ni.

Polling station zinga voter tamna ber Zemabawk VIII-ah mi 1,481 an awm a, voter tlemna ber Thehlepah mi 26 an awm.

Mizoram MLA inthlanpuia duty tur polling party tam ber chuan nimin khan an enkawl tur polling station panin an chhuak a, dispatch centre aṭangin district election officer-te'n an thlah liam.

Aizawl district-ah chuan polling party-te chu dispatch centre pali - Bawngkawn Brigade Field, Chaltlang Field, Tlangnuam Field leh College Venga khelmual aṭangin tirh chhuah an ni a; DEO Nazuk Kumar-i'n a thlah liam. District dangah pawh DEO-te'n polling party-te an thlah/vai liam bawk.

Aizawl district-ah hian ECI phût angin model polling station pali leh unique polling station pahnih thlan a ni. Model polling station hi ECI kaihhruaina anga hmunhma leh hmanraw ṭha awmna niin, a bika cheibâwl a ni bawk a; unique polling station chu hmunhma ṭha bakah, danglamna bik nei leh Mizoram tana chanchin (history) nei ṭha bikte thlan a ni.

Model polling station atan Aizawl North-I biala Bawngkawn-V PS (J Thankima College), Aizawl East-II biala Chhinga Veng-III PS (KVM H/S), Aizawl West-I biala Chawnpui-I PS (Chawnpui M/S) leh Aizawl South-II biala Mualpui PS (Aizawl College)-te thlan a ni.

Unique polling station atan Aizawl South-II biala Mission Veng II leh III PS (Sikulpui leh Sikulsen)-te thlan a ni bawk.