Bial 40-ah candidate 174 an awm
Vawiina Mizoram State Legislative Assembly inthlanpui neih turah constituency 40-ah candidate 174 an awm a, bial pahniha ding mi pali an awm avangin mihring zat chu 170 an ni.
Tarlan tawh angin, INC, MNF leh ZPM party-te chuan bial tin chuhin, candidate 40 ṭheuh an nei a, BJP-in bial 23 an chuh. Aam Aadmi Party (AAP)-in bial pali an chuh a, Lalpa Chhiahhlawh Intelkhawm (LCI)-in independent-in bial 21 an chuh a, candidate mi 17 an nei. Pawl behchhan nei loa inthlan chuh independent candidate mi paruk an awm.
Candidate mi 170-te chu mipa 155 leh hmeichhia 15 an ni a, hmeichhia 15-te'n bial 17 an chuh a, mipa 155-te'n bial 157 an chuh. BJP-in candidate hmeichhia pathum an nei a, INC, MNF leh ZPM-te'n pahnih ṭheuh an nei a, LCI-in pali an nei. Independent-a chuh tur mi paruk zingah hmeichhia pahnih an awm bawk.
Tuichang biala MNF candidate Tawnluia upa berin, kum 80 a ni a; candi-date naupang berte chu Tuirial biala BJP candidate F Vanhmingthanga leh, Aizawl North-I leh Aizawl East-I biala LCI candidate Lalruatfeli Hlawndo te niin, kum 31 ve ve an ni.
Candidate zingah kum 40 leh a hnuai lam mi 18 an awm a, kum 41-50 inkar mi 59, kum 51-60 inkar mi 43, kum 61-70 inkar mi 42 leh kum 71-80 inkar mi pariat an awm.