Inthlanah remna leh muanna vawng nung turin mipui ngen

Mizoram Police chuan, Mizoram inthlanpui boruakah remna leh muanna vawng nung tur leh India ram state dangte entawn tlak khawpa boruak muanawm lantir turin Mizoram mipui an ngen.

Inthlan leh a kaihhnawih thilah civil police mi 1,831, state armed police mi 2,527, central armed police force mi 2,700 leh Mizoram Home Guards mi 160 duty tir an ni a, an vaiin mi 7,218 an ni.

Mizoram Police hian thuchhuah siamin, vote thlak hun chhunga Mizoram remna leh muanna vawng him zel turin mipui an ngen a, "Boruak muanawm tak hnuaia vote thlakin, India ram hmun dangte tana entawn tur chhawp chhuak leh turin kan ngen. Mizoram mipuite police nena thawkho a, Police leh Election official dangte thu zâwm a, inthlan hlawhtling tak kan neih theih nana thawk tlâng turin kan insawm e," an ti.

Inthlan atana campaign hun chhungin state páwn aṭangin mi pawimawh bik (VVIP) tam tak an lo kal tih sawiin Police thuchhuah chuan, "Harsatna pakhat mah awm loin tluang takin campaign hun hman zawh a ni," a ti a, chu'ngte chuan Mizoramin democracy a ngaihhlutna leh inthlanna muanawm tak neih a duhna a tilang tih a tarlang.

Police tarlan danin, tun ṭum inthlanah hian candidate zawng zawng him taka an awm theih nan PSO (personal security officer) pek vek an ni a; inthlan tluang tak leh muanawm taka a kal theih nan civil police aṭangin mi 1,831, state armed police mi 2,527, central armed police force mi 2,700 leh Mizoram Home Guards mi 160 duty tir an ni a, an vaiin mi 7,218 an ni.

Mizoram Police chuan, inthlan campaign hun chhunga mipuite'n Mizorama remna leh muanna an vawn himna chungchangah an lawm thu an tarlang bawk.