Sahuanah sarâng ken luh phal lo

Aizawl Zoological Park (Sahuan) leh national highway aṭanga a penna inkar kawng chu November 8, 2023 aṭangin thawm ṭhat a ni dawn a, hei vang hian kawng khâr a ni dawn. Sahuan chhungah hman khat daih sarâng/plastic lam chi ken luh phal a ni lo.

Aizawl Zoological Park director PC Lalṭanpuia chuan, Aizawl aṭanga Sairang kawng, Aizawl Sahuan péng chu November 8, 2023 aṭangin siam a nih dawn avangin kawng khar a nih tur thu a tarlang a, "Hun eng emaw chen chhung chu Sakawrtuichhun lam aṭanga chauhin kal theih a ni ang," a ti.

Sahuan chhungah hman khat daih sarâng (single use plastic) lak luh khap a nih thu sawiin Lalṭanpuia chuan, "Sahuan kal tumte chuan manhi tui ûm, mineral water bûr ni lo leh sarânga fûn ni lo ei tur ken theih a ni a, loh theih loha hman khat daih sarâng/plastic keng lut turte chuan Rs 50-200 inkar an dahkham a ngai. Hman khat daih sarâng an ken luhte chu an ken chhuah leh chauhin an dahkham an la lêt thei ang," a ti a; keng chhuak lo hrim hrimte chuan pawisa dahkham an chàn dawn thu leh keng chhuak kim lote pawhin a àwm tâwk pawisa an chawi dawn thu a tarlang bawk.