Inthlana duty mi pahnih an thi

Vawiina Mizoram MLA inthlanpuia duty police pahnih chu an thi a, anmahni thlaktu tur ruat leh nghal a ni. Chief Electoral Officer (CEO) chuan, inthlana duty-te'n vanduaina an tawk chu pawi an tih thu a tarlang.

Lawngtlai district-a Tuichawng bial chhung, Jarulsury polling station-a duty tur polling official mi pali leh venhimna hna thawktu tur police pahnih phurtu lirthei (Sumo) chu November 5, Pathianni khan Udalthana-1 bul, Chawngte aṭanga km. 20 vela hláah a chesual a; 4th IR constable Z Lalmuanzuala a thi.

Thu dawn danin, lirthei hi kawng chhoa a tlân chhuak zo lo chu polling party-te'n an nawr a, an nawr chhuak zo lo, hnung záwnga a tawlh lêt chu kawng thlangah a tawlh liam a, Z Lalmuanzuala chu a hnáwl a ni.

Chêtsual thu hriat a nih veleh Lawngtlai district election officer Joseph H Lalramsanga chuan Lawngtlai SP leh sorkar hotu dangte'n an ṭhutkhawmpui nghal a; a hmuna kal turin morgue van tirh nghal a nih bakah, chêtsual dan enfiah turin sector magistrate tirh nghal a ni. Jarulsury PS-a duty thlaktu ruahman nghalin, Pathianni zan khan an chhuahtir nghal a; chhiat tâwkte leh hliamte tana zangnadawmna awm theite an sawiho nghal bawk.

Mizoram CEO tarlan danin, November 5, 2023 tlai dar 5:10 khan Election duty-a Champhaia awm 2nd IR constable Lalfakawma chu Champhai District Hospital-ah pancreatitis vangin a thi a ni.

CEO thuchhuah chuan, inthlana duty laia vanduaina tâwka thi ta Z Lalmuanzuala leh Lalfakawma te chu uiawm an tih thu a tarlang a, "Election department chuan ram tana an inpeknate chhuanawm a ti a, an kalsan an chhungte thinlung takin a tawrhpui a, Pathianin a awmpuia a venhim zel theih nan duhsakna a hlan a ni," a ti.

Lawngtlai DEO chuan, MLA inthlan tihlawhtling tura kal chhuakte'n chhiat an tâwk leh thihna hial a thleng chu pawi a tih thu leh vanduaina tâwk chhungkuate a tawrhpui thu a sawi a; sorkar anga chhawmdawlna awm thei angte chak taka bawhzui turin ṭhutkhawma telte a chah a ni.