Siahaah ramri ven chungchang sawiho

Siaha district election officer Lalhmunsanga Hnamte kaihhruaiin nimin khan DC conference hall-ah MLA inthlanpui neih tur chungchangah police hotute leh Assam Rifles aiawhte an ṭhukhawm. DEO chuan, Siaha district chu Myanmar nena ramri nei a nih avangin inthlan vuakvêtah fimkhur zual a ṭul thu a sawi.

Lalhmunsanga Hnamte chuan, inthlanna felfai leh thianghlim tak neih a nih theih nan venhimna lama thawktute chu theihtawp chhuah turin a chah a, "Siaha district hi Myanmar nena ramri nei a nih avangin fimkhur a ṭul zual a, international border leh inter-district a venhimna thawktute'n khauh zawkin thawk ang che u," a ti.

Election Commission of India-in inkaihhruaina a siam (SOP for 72 Hours) angin international border leh inter-district a venhimna thawktute chu vote thlak hma ni thum aṭangin khauh taka venhimna kalpui tura tih an ni a, inthlan result puan thleng a huam. Constituency chhunga lirthei lut leh chhuakte'n silai leh dan phal loh thil an phurh leh phurh lohte an endik tur a ni.

International border-a venhimna thawkte chu vote thlak ni hma ni thumna aṭanga November 8, 2023 thleng ramri khâr tura tih an ni a; Siaha district leh Myanmar ramri venhim hna hi Assam Rifles-in an thawk mek a ni.

Siaha district-a venhimna uluk ngai bik (strategic point) Lobo, Phura leh Kaocho chu Mizoram Police-te'n an vil a; Ainak, Archhuang leh Nao-Aotlah te chu Assam Rifles-in an vil thung.