KHAWTHLIR

Thisen pe

Tipa-L Pentecostal Youth Department (UPC NEI) chuan nimin khan an kohhran hall-ah thisen pek an huaihawt a, Siaha District Hospital tan thisen unit 33 an pe a, petute mipa 28 leh hmeichhia panga an ni. PYD, Lunglei district pawhin Rawpui commnunity hall-ah Lunglei Civil Hospital tan thisen unit 29 an pe a, petute mipa 23 leh hmeichhia paruk an ni.

Pharmacy meeting

India rama pharmacy rorelna sang Pharmacy Council of India chuan naktuk Nilaini hian Aizawlah Executive Committee meeting an nei dawn. Ṭhutkhawm hi Mizoram State of Pharmacy Council-in RIPANS-ah an thleng dawn a ni.

Sum hman dan endik

Champhai district MLA bial pathum tana expenditure observer Abhishek J Jain hoin nimin khan MLA candidate-te sum hman dan endik vawi thumna leh a hnuhnung ber neih a ni a; sum hman dante a fel thawkhat tlânga hmuh niin, ziah fel ngai leh siamṭhat ngai tlem azawng nei an la awm. Sum hman dante chu vawiin tlaiah ECI portal-ah dah (upload) tura ruahman a ni.

Punkhawm khap

Kolasib leh Mamit district magistrate-te chuan an district chhungah boruak muanawm tak hnuaia mipuiin vote an thlak theih nan inthlan kaihhnawiha duty leh vote thlak tur ni lote chu hmun khatah mi panga aia tam punkhawm khap a nih thu an puang. Kolasib-ah chuan thupek hian November 8, 2023 zing dar 2 thleng a huam a; Mamitah chuan November 8, 2023 zing dar 6 thleng a huam thung. Punkhawm hi district dangahte pawh khap a lo ni tawh bawk.