MLA inthlanpuiah vote 82.20% a tla: Voter vote thlâk vekna PS pahnih a awm

November 7, 2023-a Mizoram Legislative Assembly inthlanpuiah vote nei mi 8,52,088 aṭangin 82.20%-in vote an thlak. Polling station (PS) 1,276 zinga pahnihah voter zawng zawngin vote an thlâk a; vote thlâk hi zan dar 11:50-ah zawh niin, vote thlâk zawh hnuhnunna ber chu Marpara South PS a ni.

Mizoram inthlanpuiah hian November 7, Thawhlehni zing dar 7-ah vote thlâk ṭan a ni a; Election department tarlan danin, assembly constituency 40-a polling station 1,276-ah vote thlâk niin, inthlan ní (poll day) bika EVM-a vote tla zat chu 6,85,352 a ni a, voter zawng zawng aṭangin 80.43% a ni.

November 6, 2023 thlengin postal ballot hmangin vote 15,061 a tla a; postal ballot-a vote tla leh vote thlak nía EVM hmanga vote tla zawng zawng chu 7,00,413 a ni a, voter zawng zawng (service voter tel loin) 8,52,088 aṭangin 82.20% a tling. Voter zat leh vote tla zatah hian service voter zat leh vote thlâk zat chhût tel theih a la ni lo.

Nimin khan district hrang hrangah inthlan thlirletna leh enfiahna, post poll scrutiny neih a ni a, post poll scrutiny tihfel a nih hnuah vote tla zat dik tak hriat theih a ni ang.

South Tuipui biala polling station pahnih - Aithur PS (voter 116) leh Lungpuitlang PS (voter 106)-ahte vote nei zawng zawngin vote an thlâk vek a; constituency anga vote tlak ṭhatna ber chu Tuikum bial niin, 87.32% a tla. District anga vote tlak ṭhatna ber Serchhip district-ah 84.75% a tla a ni.

Inthlanah khan vote thlak hmaa EVM-a vote thlak chhinna, mock poll aṭanga vote thlak zawh thlenga EVM chhia report Election department-in an dawn dan chu - ballot unit chhia 49, control unit chhia 46 leh VVPAT chhia 139 a ni. Khâwl chhiate chu thlâk zel a ni a, vote thlâk ṭhat ngai awm loin, tluang taka vote thlak zawh a nih thu Election department chuan an tarlang.

Vote thlâk zawh hnuah polling station tina polling party-te chuan tihfel ngaite an tih zawhah district headquarters an pan khawm nghal a, tih dan tur ruahman anga an tihfel zawhah EVM-te chu strong room-ah dah luh nghal a ni.

Mizoram inthlanpuia vote tlate hi Election Commission of India (ECI)-in a duan lâwk angin December 3, 2023-a chhiar turin inbuatsaihna kalpui zel a ni a; pawl hrang hrangin vote chhiar hun sawn turin ECI ngen mah se, nimin thleng kha chuan ECI aṭangin chhànna hmuh a la ni lo.

Tarlan tawh angin, Election Commission of India (ECI) duh dan ang leh thuneitute ruahman angin polling station 1,276 zinga a zatve aia tam 53.25%-ah webcasting tih a ni a, polling station-a chêt vel dan chu live video-a pek chhuah niin, thuneitute'n district election officer pisa aṭangin an lo vil a ni.