Congress-in lawmthu an sawi Sorkar ṭha a thlen kan beisei - MPCC

Mizoram Pradesh Congress Committee (MPCC) chuan thu­chhuah siamin, Mizoram inthlanpui tluang taka neih a ni chu an lawm thu leh Congress party tana thâ leh zung sengtute hnathawhin sorkar ṭha a thlen ngei an beisei thu an tarlang.

MPCC chuan, Mizoram inthlanpui tluang taka neih a ni leh mipuite'n vote an thlak ṭha chu lawmawm an tih thu sawiin, "Ram hruaitu thlan heti taka kan ngai pawimawh hi kan ngai hlu a, mipui chungah lawmthu kan sawi. An duhthlanna hlu tak lantirtute'n ram hruaitu ṭha tak thlang chhuak se tih hi Congress party duhthusam a ni," an ti.

Congress party chuan, inthlan buaipuitu zawng zawngte leh MPF-te'n inthlan muanawm leh felfai tak an buatsaih avangin an chhuan thu leh lawmawm an tih thu an sawi a; chutih rualin, hmun ṭhenkhatah inthlan buaipuitu vanduaina tâwk leh harsatna tâwk an awm chu an tawrhpui thu an tarlang.

MPCC chuan, Congress party vote-tu te, Congress party tana thâ leh zung, hun hlu tak sênga ṭhahnemngai taka beitute an ngaihlu tih sawiin, "In hnathawh hian sorkar ṭha min la hruai thleng ngei ang tih kan beisei a, lawmthu a sawi tak meuh a ni. In hnathawhte Congress party chuan a hre reng dawn a, in hnathawh hian tun leh nakin thlengin Congress party chu a tichak zel ang tih kan ring tlat. Mipui duhthusam leh beiseinate a taka tihhlawhtlin kan tum a ni," an ti.