KHAWTHLIR

Hlawh pe chhuak

Mizoram sorkar chuan nimin khan sorkar hnathawk mek leh pension tawhte October 2023 thla hlawh tur a pe chhuak.

Chetsualnaah thi

November 7, Thawhlehni zan khan K Lalramnghaka (25) s/o K Lallawmawma, Lunglei Rahsi Veng chu lirtheia chetsualna vangin a thi. Thu dawn danin, K Lalramnghaka hian scooty hmanga truck lehpelh a tum chu car nen an intái a, scooty aṭanga tla thlain, truck hnuaiah a inbarh lut a, chetsualna hmunah a thi a ni.

Vui liam

October 28, 2023 aṭanga chin hriat loa awm Lalnunthiangi (33), Mission Veng chu November 2, 2023 zan dar 11 velah tuikawng (canal)-ah thia hmuh a nih hnuah nimin khan an chenna in thlenpui a ni a, tlaiah vui nghal a ni. Lalnunthiangi hi Thapar University (Thapar Institute of Engineering and Technology), Patiala, Punjab-a Biotechnology-a doctor of philosphy ti mek a ni a; a thih danah mi dang pawikhawihna rinhlelhawm a awm loh thu leh Bhakra canal-ah a tla hlum nia a lan thu a chanchin ziahnaah tarlan a ni.

AAP lawmthu

Aam Aadmi Party, Mizoram president Andrew Lalremkima chuan nimin khan thuchhuah siamin, Mizoram inthlanpui neih zawh taka an candidate-te duhsak taka vote-tute chungah an lawm thu a tarlang. AAP President chuan, "Kan candidate-te an tling emaw, tling lo pawh nise, kan pawl din chhan chu sorkar kalphung ṭha lo leh dik lo siamṭha tur leh mi narânte tana aw chhuah thei ni tura thawh chhunzawm zel hi a nih tlat avangin hmasawnna kan ramah a lo awm theih nan theihtawp kan chhuah zel dawn," a ti.

La hmu lo

Mizoram MLA inthlana duty tura rawn kal Assam Police-a constable Sabin Nath chu October 5, 2023 zing dar 7 vel aṭangin chin hriat loin a awm a, he thuziahlai thleng hian hmuh a la ni lo. An mi leh sa a bo avang hian 9th Assam Police Commandant chuan nimin khan Ngopa a pan.