Covid-19 darh tur venna atan Aizawlah total lockdown puang

Nimin tlaia Health minister hoa meeting-ah hian tun hnaia Mizoram Covid-19 dinhmun an thlir a, mipui himna tur leh hri vei chhui (contact tracing) chak zawka kalpui a nih theihna turin total lockdown puan hi an rawt a ni. Sorkar thuchhuah tarlan danin Aizawl khawpui lockdown chhung hian phalna nei lo tan Aizawla luh leh chhuah phal a ni dawn lo a; hemi chhung hian a tam thei ang ber hri inkai darh thei dinhmuna dingte chhui an ni ang.

August 15 thleng khan Mizoramah Covid-19 positive mi 777 hmuh chhuah an ni tawh a; sorkar chhinchhiah danin August 15-ah bik khan hri kai mi 64 hmuh chhuah belh an ni. August 14, Zirtawpnia ZMC laboratory-a swab sample endik zingah August 8, 2020 zinga doctor pakhat, Covid-19 veiin a tlawh Focus Photo Express, Mission Veng neitu chhungkua, Salem Venga mite zingah naupang pahnih - kum 12 leh 14 mite'n hripui an vei tih hmuh chhuah a ni a; dawr nghaktu ber an nu leh pate erawh chu vawi hnih endik an nih hnuah pawh an negative.

Salem Veng Local Task Force (LTF) chuan August 15, Inrinni chawhma dar 10 aṭangin an vengah total lockdown an puang nghal. Salem Veng ṭhenawm Veng­hnuai pawhin Inrinni tlai khan total lockdown an puang a; Tlangnuam Vengtharah pawh Focus Photo Express tlawhtu an awm avangin Inrinni zan dar 8:30 aṭang khan total lockdown an puang. Focus Photo Express tlawhtu awmna, Phulpui leh Lungleng-I khuate pawhin total lockdown an puang mek. Hetih lai hian, Mission Veng LTF-in August 13, 2020 zan aṭanga total lockdown an puan chu August 15 tlai dar 5 khan an hlîp a, an veng mi, Focus Photo Express tlawhtute erawh chu inkhung turin an ti thung a; Inrinni leh nimin khan mi eng emaw zatte swab sample lâk a ni.

August 14 veka sample endikah Chaltlang Lily Venga mipa naupang kum 13 miin hripui a vei tih hmuh chhuah a ni a, a hmaa hripui vei hmuh chhuah tawhte aṭanga kaia ngaih a ni. Chaltlang Lily Veng LC secretary Lalfakawma hnen aṭanga thu dawn danin, Lily Vengah hian BSF quarantine centre (NIELIT) vengtu police-in hripui a vei tih hmuh a nih hnuah Covid-19 vei mi 10 hmuh chhuah a ni tawh a, nimin zinga result chhuakah erawh kai hmuh a ni lo. 

August 14 vêk khan positive contact aṭanga kai nia hriat Edenthar Vengah mi pahnih (nufa) hripui vei hmuh chhuah a ni a, anni hi Lily Venga Covid-19 veite aṭanga kái chhâwnga ngaih an ni. Edenthar Veng LTF chuan nimin aṭang khan total lockdown an puang. Chaltlang Lily Venga hripui veite nena intlawhpawh an awm avangin Ṭhuampui LTF chuan nimin khan total lockdown an puang a; nimin tlai aṭang khan Zuangtui LTF-in an puang ve leh.

August 14-a Covid-19 vei hmuh chhuah zingah Darlawn damdawi-in (PHC)-a thawk nurse pakhat a tel bawk a, hei vang hian Darlawn khuaah total lockdown puan a ni. Hemi kaihhnawihah hian Sawleng khuaah total lockdown puan a ni a; Darlawn lam kaihhnawihah Ramhlun North-a bial ṭhenkhat leh Zuangtuiah total lockdown puan a lo ni tawh bawk. Darlawn aṭanga thu dawn danin, Darlawn nu Covid-19 positive hi tun hnaia Sakawrdaia Manipur lam aṭanga rawn lut nu pakhat, hripui vei aṭanga kai  nia hriat a ni a, a chhungte erawh chu an negative vek thung.

    August 21 (Zirtawpni) zing dar 4:30 thleng AMC huam chhungah total lockdown puan a ni.

    Phalna nei lo tan Mizorama luh leh chhuah phal a ni lo.

    Phalna nei lo tan Aizawla luh leh Aizawl aṭanga chhuah phal a ni lo.

    Inkhàrkhip chhungin contact tracing, a bikin secondary contact zau zawka chhui a ni ang.

    Frontline worker ṭhenkhat test a ni ang a, random sampling neih tum a ni.

    Lockdown hian hengte hi a huam lo: Law & order kengkawhtute, LC & VC election duty, Covid-19 dona atana thawktu, media, tui sem, electricity duty, inbiakpawhna lama thawk, bawnghnute sem, chanchinbu sem, mipui ni tin mamawh phur lirthei.