Vote chhiar hun sawn turin pawl aiawhte'n ECI-ah thlen nawn tum

Mizoram Legislative General Election-a vote tlate chhiar hun tura ruat December 3, 2023 sawn tura ngen chungchangah Mizoram Kohhran Hruaitute Committee (MKHC), political party leh tlawmngai pawl aiawhte chuan nimin khan chief electoral officer Madhup Vyas chu a pisaah an kâwm. Vote chhiar ni sawn turin Election Commission of India-ah na zawka ngenna thlen leh an tum.

CEO Madhup Vyas kawmnaah hian MKHC leh NGO Coordination Committee aiawhte bakah, political party panga - MNF, ZPM, MPCC, BJP leh Aam Aadmi party aiawhte an tel.

Páwl hrang hrang hruaitute chuan, Mizoramah vote chhiar ní atan Pathianni ruat a la nih ngai loh thu te, Mizote tan Pathianni chu sakhaw thila a pawimawh dan leh Pathiannia Mizote hun hman dan tlangpuite CEO an hrilhfiah a; ECI-in vote chhiar ní chu a sawn ngei theih nan hma laksak turin an ngen a ni.

Thuthar thehdarhtute zawhna chhangin MKHC aiawhte chuan, vote chhiar ní sawn turin ECI hnenah ngenna ṭum thum an thehluh tawh thu leh chhanna an la dawn loh thu an sawi a, "Kar hmasa khan MKHC aiawhte chuan CEO hi kan hmu tawh a, vote chhiar ní sawn tura political party-te ngenna lehkha leh an aiawhte nen vote thlak zawhah lo kal rawh u min ti a, kan inkawmnaah hian vote thlak ní sawn tura kan lo ngen tawhnate kan sawiho leh a ni ber," a ti a; political party pangate'n vote chhiar ní sawn tura ngenna an thehluh vek thu an sawi.

CEO-in a lo dawnsawn danah an lawm thu sawiin MKHC aiawhte chuan, "CEO hian kan ngennate hi vawiinah emaw, naktukah emaw ECI-ah a thehlut ang a, strong recommendation kan thehlut ang," an ti.

MKHC hruaitte chuan, ECI-in vote chhiar hun sawn tura an ngennaah a chhàn loha hmalak zel dan tur chungchangah, an kal zel dan tur chu NGO emaw, political party emawte kutah a innghah tawh thu leh MKHC chuan an tih theih ang zawng zawng an tih thu an sawi bawk.