Vawiinah Aizawl South III-a Muallungthu-ah vote thlâk ṭhat a ni dawn

November 7, 2023-a Mizoram inthlanpui vote thlakah Muallungthu Polling Station-ah thil fel lo a awm avangin vawiin hian vote thlâk ṭhat a ni dawn a, zing dar 7 aṭanga tlai dar 4 thleng vote thlak hun hawn a ni ang.

Tarlan tawh angin, Muallungthung PS-ah hian November 7-a inthlan vote thlâkah khan mipuiin vote an thlâk ṭan hmaa EVM-a vote thlâk chhinna, mock poll-a vote tlate la chhuak loa mipui vote thlaktir zui a ni a; hei vang hian vote thlâk ṭhat leh turin ECI chuan thutlukna a siam a ni.

Aizawl South-III bialah hian candidate pali an awm a, Muallungthu PS-ah voter 1,084 an awm. candidate-te chu - Rosiamngheta (INC), Dr F Lalnunmawia (MNF), Baryl Vanneihsangi (ZPM) leh Zaichhawna Hlawndo (Independent - Lalpa Chhiahhlawh Intelkhawm)-te an ni.

Muallungthu khuaa vote thlak ṭhat leh tur chungchangah hian Aizawl district election officer Nazuk Kumar chuan hriattirna a tichhuak a; polling station aṭanga metre 100 huam chhungah vote dilna anga ngaih thei thil tih khap a nih thu a tarlang.

Aizawl DEO chuan, political party leh candidate-te tan campaign phal a ni lo tih tarlangin, "Electronic media/social media leh a tlukpui dangteah inthlan kaihhnawih, mipui rilru sûkthlêk tidanglam thei thilte tarlan/chhuah phal a ni lo. Mipui ngaihdan lâkna siam leh vote thlak zote kawmna/zirbingna aṭanga inthlan result rinlawkna exit poll neih loh tur a ni. Hei hian vote thlak ṭan hun aṭanga a zawh hnu darkar chanve thleng a huam ang," a ti.

Muallungthu khuaah mi panga aia tam punkhawm emaw, inhàwrkhawm emaw phal a nih loh thu te, aurinna hman phal a nih loh thu te, thupek zâwm lote chu IPC Section 188 hmanga hrem theih an nih thute DC chuan a tarlang bawk.