Inthlanah Thawhhona thuthlung kan zâwm ṭha thawkhat tlang - MPF General Secretary

Mizoram People Forum (MPF) general secretary Rev. Lalramliana Pachuau chuan, MPF leh political party-te Thawhhona Thuthlung chu hmun ṭhenkhatah bawhchhiatna awm mah se, political party, candidate leh mipuiin an zawm ṭha thawhkhata an hriat thu a sawi.

Vanglaini palai zawhna chhangin Rev. Lalramliana Pachuau chuan, "Khawi emaw laiah Thawhhona Thuthlung pêla chêtna awm ve bawk mah se, kan zawm ṭha tlang viauin kan hria a, kan lawm khawp mai. Kan hmalaknaah kan hlawhtling hlein kan hria," a ti.

MPF General Secretary chuan, an beisei aia hmain inthlan hun ruat a nih thu sawiin, "Inthlan hnaihah kan ṭang hle a, social media kan hmang ṭangkai hle. Kan constituency forum leh local forum-te pawhin hma an la ṭha hlein kan hria," a ti a; MPF hmalakna ṭhatzia national media-te'n an tarlang ṭhin leh Mizoram Chief Electoral Officer pawhin MPF hmalakna a faknate chu ngaihnawm an tih thu a sawi.

Rev. Lalramliana Pachuau chuan, Mizoram inthlanpui vuakvêtah political party-te inepna boruak rit lutuk leh buaina lian tham awm loa inthlan a ni chu lawmawm an tih tak zet thu a sawi bawk.