SEC ṭhutkhawmah inkhawm tihtlem chungchang ngaihtuah a ni dawn

Synod Executive Secretary (SEC) ṭhutkhawm vawi 303-na chu nimin khan ṭan a ni a, November 13, Thawhṭanni thleng neih a ni ang. An thu ngaihtuah tur zingah inkhawm tihtlem zirchianna chungchang a tel.

SEC ṭhutkhawm hi Synod moderator Rev.Dr C Chawnghmingliana'n a kaihruai a; secretary Upa B Lalhmunliana leh finance officer Rev. VL Luaia Hranleh ten report an pe. Manipur buaina vanga harsatna tâwkte ṭanpui nan pawisa fai Rs 94,20,000 pek a nih thu te, relief camp-a awm mekte tana bungbel Rs 5,00,000 man leisak tura rel a nih thu te, silhfen leh mutbu pastor bial panga aṭanga dawn khawm chu Churachandpur phurh thlen tawh a nih thute tarlan a ni.

Tun ṭum SEC ṭhutkhawmah hian agenda 107 a awm a; chu'ng zingah chuan inkhawm tihtlem zirchianna chungchang te, inkhawm kalhmang zirchianna te, Kristian Hlabua hlate audio-a daha YouTube-a dah chungchang te, Central KṬP hmalakna YRC a puitlin thuai theih nana Synod-in hmalakpui tura rawtnate a tel.